Resson d'Oc

Pausa estivala per Resson d'Oc

Parti en vacanças un brèu... alavetz Resson d'Oc se pausa fins a la fin d'agost. Ne profeicharai per soscar a de melhoraments per aqueste blòg. Espèri vòstras idèas. Al còp que ven !

La Setmana n°671 viatja a Escòcia

Tanben dins lo setmanièr del 10 de julhet, la Felibrejada 2008 en Peirigòrd. Vaquí lo somari :

• Las lengas tòrnan dins la constitucion, p. 2
• Politica contractuala entre l’Estat e las Regions, p. 3
• En Bearn que i a dètz-e-sèt sites d’ensenhament en occitan, p. 4
• Los escoceses « Wha’s like them ? » son pas parièrs, pp. 5, 6 e 8
• E encara un còp tòrna l’ors ! ; Çò que disètz, p. 9
• L’afar Belmon seguís, p. 10
• 1209 - 2009 ; Revistas, p. 11
• La Felibrejada càmbia de color, p. 12

Prètz : 1,55€ per numeró, 78,50€ l'abonament annal. L'editor n'es Vistedit.

Sommaire en français, cliquez ci-dessous.

Nerviós Trobador, lo novèl disc de Goulamas'K, de crompar sul siti del grop

Lo grop Goulamas’K sortís un disc novèl, de crompar sus son siti Internet. Nerviós Trobador es lo CD de 5 títols de la virada de prima del grop. Los «trobadors rockers internacionalistes» de Besièrs prepausan una musica mestisada, un mescladis de ska rock, de reggae punk, amb d’acents tradicionals e un son de fanfara. Cantan en occitan, en francés, en catalan e en espanhòl una musica engatjada e afortida per festejar fins a la fin de la nuech.

Présentation en français, cliquez ci-dessous.

Negras trevanças, una epopèa d'Yves Robert de legir en linha

Cercatz un roman de legir per las vacanças ? En occitan e gratis ? La responsa es sul oèb. Yves Robert, un girondin amorós de la lenga occitana, bastís dempuèi 2005 una òbra literaria en linha, «Negras Trevanças». Es una tièra en tres epòcas, que la doas primièras, «Los marrits sòmis» e «Los pantaisses sagnosses» son de legir sul siti de l’autor. La tresena epòca, «Las cachavièlhas infernosas», es en cors d’escritura e deurià esser publicada sul siti abans la fin de l’annada. Segon l’autor, es un biais d’epopèa guerrièra, un «negre raconte a l’imatge de la negror del mond». Aquò's un brave trabalh d’escritura e d’edicion, força plan editat e agradiu de legir.

Article en français, cliquez ci-dessous.

Infòc, l'informatiu occitan aranés : l'edicion del 5 de julhet

Cada dissabte, l'Associacion aranesa entara difusion d'Occitània en Catalonha (Adòc) difusa Infòc en directe sus Barcelona TV. Es un programa informatiu en occitan, una setmana en lengadocian, l'autra en aranes. Serià pecat que solament los telespectators catalans pòsquen n'aprofechar ! Vesètz aici l'edicion de dissabte 5 de julhet, en lengadocian. Lo programa es sostitulat en catalan.

Présentation en français, cliquez ci-dessous

Ont pòdi aprene l'occitan ? Demanda a l'IEO-06 !

Ont aprene l’occitan ? Aquò’s pas totjorn aisit d’o saber. L’Institut d’estudis occitans 06 a publicat sus son siti Internet una mapa Google Maps que recampa los luòcs de l’airal occitan ont se debanan de corses publics per adults (mai de 250 a l’ora d’ara). En clicar sus los punts blaus, acedatz a mai d’enresenhas sus los corses (organisme, oraris, adreiça…). Osca per aquesta iniciativa que porgis un otis dels mestièrs !

Article en français, cliquez ci-dessous.

La Setmana n°670 esten lo debat sus la television publica a la question del centralisme

Tanben dins lo setmanièr del 3 de julhet, la presentacion del malhum europenc de la diversitat lingüistica (NPLD —  Network to promote linguistic diversity). Vaquí lo somari :

• L’occitanisme es present a l’escala europèa, p. 2
• La creacion occitana se pòrta plan, pas sa difusion, p. 3
• La revista «Nature» critica lo vòte dels academicians, p. 4
• Lo Senat, un còp de mai, p. 5
• Perqué un servici public de l’audiovisual centralizat ?, pp. 6 e 7
• Viatge al país de las televisions autonomicas, p. 8
• E perqué pas en cò nòstre ?, p. 9
• Eveniments d’estiu, p. 10
• Rugbi, p. 12

Prètz : 1,55€ per numeró, 78,50€ l'abonament annal. L'editor n'es Vistedit.

Sommaire en français, cliquez ci-dessous.

Un banh lingüistic e cultural a l'Escòla de Vilanuèva d'Òlt (47) del 10 al 16 d'agost

L'Escòla Occitana d'Estiu es un estagi de lenga e de cultura occitana que se debana cada estiu a Vilanuèva d'Òlt (47). La 34ena edicion aculhirà sos escolans del 10 al 16 d’agost. L’escòla prepausa de corses de lenga, d'expausats, de talhièrs de cant e de danças, per que los participants s’immergíscan dins un banh lingüistic e cultural. D’activitats son tanben previstas pels mainatges. Las seradas son consacradas al divertiment (balètis, contes, musica…). Vos podètz inscriure per tota la setmana o a la jornada. Programa complet sul siti de l'Escòla.

• Entresenhas e inscripcions (abans lo 31 de julhet) : 05.53.41.32.43/[email protected].

Présentation en français, cliquez ci-dessous.