Resson d'Oc

L'Esquèma de Miegjorn-Pireneus per desvolopar l'occitan

Dins son darrier numero (febrièr-març de 2008), Midi-Pyrénées Info, lo jornal del Conselh regional de Miegjorn-Pireneus, presenta l’Esquèma regional de desvolopament de l’occitan (SRDO) que la region aprobèret lo 20 de decembre passat. Lo SRDO prevei d’encoratjar l’ensenhament e la formacion, la sensibilizacion a la lenga e lo devolopament d’otisses de communicacion, en collaboracion amb las associacions, los despartaments, las autras regions occitanas e l’Estat.

Eleccions municipalas : Convergéncia Occitana constata un consensus per far viure le lenga e la cultura occitanas a Tolosa

Lo collectiu d’associacions Convergéncia Occitana fa un bilanç fòrça positiu de lo rencontre qu’organizèt lo 15 de febrièr passat amb los candidats a la comuna de Tolosa o sos represantants per parlar de la politica municipala en favor de la lenga e de la cultura occitanas. La sala del Senescal èra claufida e los candidats faguèron bon acuèlh a las proposicions de las associacions. Segon Jean-François Laffont, president de Convergénecia Occitana, l’escasuda d’aqueste rencontre prova que «la cultura occitana es venguda un enjòc cultural, mas tanben social e economic : lo de l’identitat culturala retrobada e afortida d’una vila e d’una encontrada.» Trobaretz çai-jos lo comunicat de Convergéncia Occitana en francès e en occitan.

Téléchargement convergencia_occitana.pdf

Eleccions municipalas : los candidats e lo programa del Partit Occitan

Los autonomistas occitans participon a las eleccions municipalas dels 9 e 16 de març que ven. Lo Partit Occitan nos a mandat la lista de la comunas ont presenta de candidats (que coneisson a l'ora d'ara), dins tota l'Occitània, que publicam çai-jos. Tanben trobaretz çai-jos las proposicions municipalas d'aqueste partit.

Téléchargement programa_municipal.pdf

Municipalas a Pau : los calandrons bastiguèron un collègi simbolic amb de cartons

Lo dissabte passat, 9 de febrièr, 150 a 200 personas simpatisantas de las diferentas associacions occitanas de Bearn manifestèron a Pau per demandar un local qu'abrige la tresena calandreta de l'aglomeracion e lo collègi calandreta a la dintrada de setembre 2008. Simbolicament, los calandrons e collegians bastiguèron lor collègi amb de cartons en presencia de los candidats a la comuna de Pau, François Bayrou, Martine Lignières-Cassou e Yves Urrieta, l'actual conse. Tots s'engatjèron a discutir per ajudar lo collègi a trobar un bastiment entà la dintrada. La municipalitat de Pau e lo conselh general son tanben pres a ajudar sia a crompar los locaus, sia a ajudar financiarament una aquisicion. Cai-jos l'apèl a manifestar.

Municipalas a Tolosa : los electors e los candidats convidats a debatre sus lo tèma occitan lo 15 de febrièr

Amb las eleccions municipalas del 9 de març, los amoròs de la lenga e de la cultura occitanas tenon una oportunitat unica de far ausir lor votz. Lo collectiu Convergéncia Occitana, que recampa las associacions tolosencas de l’Ostal d’Occitània, convida los candidats al Capitòli a un debat dobert a tot lo monde sus aqueste tèma lo divendres 15 de febrièr a la Sala del Senescal de 18h a 19h30.

Téléchargement Propositions_pour_culture_occitane_Toulouse.pdf

Un ostal comun per las associacions occitanas de Montpelhièr

L’Espaci Jacme 1èr d’Aragon foguèt inaugurat lo dissabte 2 de febrièr a Montpelhièr per lo president del conselh regional Lengadòc e Rosselhon, Georges Frêche. Abrita las activitats d’associacions culturala ibericas, e subretot ven lo sèti d’associacions occitanas recampadas dins l’Ostal d’Occitània : Confederacion Occitana de las Escòlas Calandretas, Federacion de las Calandretas d’Erau, associacion La Poesia, Talhièr Parlar, annèx del Centre de Formacion Professionala Occitan e Cercle Occitan de Montpelhièr (informacion de lo Centre de Formacion Professionala Occitan).

Espaci Jacme 1èr d’Aragon
Ostal d’Occitània
117 carrièra dels Estats Generals – Barri de Richter
34000 Montpelhièr
Tramway linhas 1 et 2, arrest «Rives du Lez».
Accès per la Planca dels Barons de Caravetes

Las lengas de França en debat al salon Expolangues

Lo salon annal Expolangues se tenirà a Paris pòrta de Versailles del 6 al 9 de febrièr. Destinada a promòure l'ensenhament de las lengas, defendre lo plurilingüisme e encoratjar los escambis internacionals, la manifestacion s'adreça als professionals et al grand public. Amb aqueste salon, la Delegacion generala a la lenga francesa e a las lengas de França del ministèri de la Cultura organizarà una taula redonda lo divendres 8 de febrièr sus aqueste tèma : «Las lengas de França, situation e enjòcs». Vaquí la présentation que ne fa lo siti d'Expolangues.