Resson d'Oc

Lo programa complet de Total Festum 2008, la fèsta de las culturas occitana e catalana en Lengadoc-Rosselhon (14-24 de junh)

Total Festum, la fèsta granda de las culturas occitana e catalana en Lengadoc-Rosselhon, se debanarà dins tota aquesta region del 14 al 24 de junh. Concerts, balètis, fuòcs, jòcs, taulejadas seràn tant de biais de celebrar la Sant Joan. Dins aqueste encastre se podrà ausir a Montpelhièr una creacion musicala de Laurent Audemard et Jakes Aymonino, Rasims de Luna, altorn de l’obra poètica de Max Rouquette, creada a l’escasença del centenari de sa naissença (19 de junh a 21 oras a l'Opéra Comédie de Montpelhièr).

Programa de telecargar çai-jós (l'ai trapat sul siti de la Felco, Federacion per l'Ensenhament de la Lenga e de la Cultura d'Oc). 

Téléchargement Total_Festum_2008.pdf

Article en français, cliquez ci-dessous.

Lo govèrn refuta la ratificacion de la Carta europea mas promet una lei

Dimecres passat 7 de mai se debanèt a l'Assemblada nacionala un debàt sens vòte sus las lengas regionalas — dins l'indiferéncia generala de la clasa politica e dels mediàs, cal confessar. La ministra de Justicia, Rachida Dati, l'avià promes en genièr quora l'Assemblada ratifiquèt lo novèl tractat europeu. Atal que se podià pensar, lo govèrn, per la votz de Christine Albanel, ministra de Cultura, anoncèt que ratificarià pas la Carta europea de las lengas regionalas, "contraria a nostres principis". En cambi, prometèt un "tèxte de lei", entà dessenhar "un encastre de referença" per "dobrir un espaci d'expression mai larg" a las lengas regionalas. Veirem ben.

Téléchargement debat_assemblee.pdf

Article en français, cliquez ci-dessous.

Los forums occitans s'espandisson sul oèb

Ja avèm parlat mai d'un còp del forum Occitania !, plan actiu e convivial, amb 135 membres marcats e mai de 5800 messatges mandats. S'i parla de totes los subjèctes que concernon la lenga e la cultura d'òc. Es pas solet que i a tanben lo forum d'Occitania.org, de la val d'Aran, amb 81 sòcis e gaireben 2000 messatges. I a encara lo del collectiu d'associacions tolosanas Convergencia occitana. Senhalem par acabar lo forum d'Ossau.net qu'acuhlis una seccion en bearnés, amb 1085 sòcis. Lo siti es especialisat sus la val d'Aussau, mas sul forum las discutidas son mai generalas. Una lista de completar...

Article en français, cliquez ci-dessous.

La Val d’Aran encoratja sos estajants a s’encontrar entà parlar en occitan

Lo departament de Cultura e Politica Lingüistica del Conselh General d’Aran a lançat lo Volontariat per Aranés, un programa per que las personas que conéisson basicament la lenga aranesa la pòscan parlar amb d’autras que la parlan acostumadament. Lo Volontariat per Aranés ajudarà las personas motivadas a s’encontrar. Las parelhas conversaran un minimòm de detz oras (ont, quora et de çò que vòlon). Aquesta politica s’inspira del Voluntariat per la llengua ja mes en plaça en Catalonia. Los apreneires e los tutors se dévon inscriure alprèp del Conselh General d’Aran. L'aranés, qu'es lenga oficiala dins la val d'Aran, es una varianta del gascon.

Article en français, cliquez ci-dessous.

Sota Òrme, l’associacion que vòl far viure lo gorbarin

Dempuèi le fin de l’annada passada, l’associacion Sota Òrme, afrairada a l’IEO-06, obra per promoure lo gorbarin, lo dialècte occitan que se parla a Gòrb (06). Demest sas embicions : far conéisser la plaça d’aqueste lenga dins l’occitan e sos ligams amb los parlars nissards, provençals e los autres parlars occitan. Tanben vòl encoratjar los estatjants de Gòrb a aprene e practicar aquesta lenga. Lo 8 de junh que ven, organiza una visita del vilatge en lenga gorbarina, gratis e doberta a totes. Informacions : Arlette Pastor : 6 carriera Garibaldi 06500 Gòrb ([email protected]).

Article en français, cliquez, ci-dessous.

Eleccions municipalas e cantonalas : los resultas del Partit Occitan

I avià de candidats del Partit Occitan (autonomista) dins mantunas vilas e cantons per las eleccions municipalas e cantonalas de la dimenjada passada. Aquestes candidats eran presents per de listas d’union (subretot d’esquèrra mas tanben de dreta) que defendiàn la diversitat culturala e linguistica. Atal qu’aviam balhat la lista de los candidats, vaquí los resultas.

• Elegits conselhers municipals
  La Sanha de Mar (83) : Miquèu TOURNAN ; Aurenja (84) :  A.M. HAUTANT (1er torn) ; Ais de Provença (13) : Hervé GUERRERA ; Traussa-Menerbès (11) : J. F. SAISSET (1er torn) ; Sant Just de Viaur (12) : Josiana DAUNIS-MARTY (1er torn) ; Colombiés (12) : Patrick ALCOUFFE (1er torn) ; Sent Daunis-Catus (46) : Bernat RAFFY (1er torn) ; Gavaudun (47) : Pèire BOISSIERA (1er torn)

• Eleccions cantonalas (1er torn)
  Pena d'Agenés (47) : Ives BOISSIÈRA ; supleanta : Mathilde LACASSAGNE (sostenguts pels Verts) 10,6% ; La Vaur (81) :  Danièl RIFÀ ; supleanta : Benedicta PORTAL (sostenguts pels Verts) : 10,49% ; Vielmur (81) : Joan THOMAS ; supleanta Anna-Maria PUJÒL :7,51%

Article en français ci-dessous

L'Esquèma de Miegjorn-Pireneus per desvolopar l'occitan

Dins son darrier numero (febrièr-març de 2008), Midi-Pyrénées Info, lo jornal del Conselh regional de Miegjorn-Pireneus, presenta l’Esquèma regional de desvolopament de l’occitan (SRDO) que la region aprobèret lo 20 de decembre passat. Lo SRDO prevei d’encoratjar l’ensenhament e la formacion, la sensibilizacion a la lenga e lo devolopament d’otisses de communicacion, en collaboracion amb las associacions, los despartaments, las autras regions occitanas e l’Estat.

Eleccions municipalas : Convergéncia Occitana constata un consensus per far viure le lenga e la cultura occitanas a Tolosa

Lo collectiu d’associacions Convergéncia Occitana fa un bilanç fòrça positiu de lo rencontre qu’organizèt lo 15 de febrièr passat amb los candidats a la comuna de Tolosa o sos represantants per parlar de la politica municipala en favor de la lenga e de la cultura occitanas. La sala del Senescal èra claufida e los candidats faguèron bon acuèlh a las proposicions de las associacions. Segon Jean-François Laffont, president de Convergénecia Occitana, l’escasuda d’aqueste rencontre prova que «la cultura occitana es venguda un enjòc cultural, mas tanben social e economic : lo de l’identitat culturala retrobada e afortida d’una vila e d’una encontrada.» Trobaretz çai-jos lo comunicat de Convergéncia Occitana en francès e en occitan.

Téléchargement convergencia_occitana.pdf

La senhalizacion bilingüe, un enjòc capital : l'exemple illustrat de Tolosa

Abans las eleccions municipalas, las associacions occitanas balhan lor messatge a los candidats de tots los partits. Demest lors demandas, l'installacion d'una senhalizacion publica bilingüe dins las ciutats de l'airal occitan (placas de carrièras, placas direccionalas, dintrada et sortida de vila...). Pòt far sorire d'unes, mas l'enjòc es capital.

L'occitan sul oèb : qualques sitis indispensables

Uèi, volèm senhalar tres esplechs fòrça utils, per escriure d'imèls per exemple, qu'avèm descobèrts sul oèb graciàs al forum Occitània ! que ja avèm parlat aicí e que festèja uèi son primièr aniversari. S'agís de dos diccionaris en linha. Lo primièr es un traductor occitan-francès francès-occitan qu'es plan de bon utilizar, que prepausa tanben una ajuda per conjugar los verbs. L'autre siti es una vertadièra meravilha : lo diccionari general occitan de Cantalausa, que podètz consultar en linha. Plan segur, los dos son gratuits. Enfin senhalam un autre otís que cal metre sulcòp amb vòstres sitis favorits, un «traductor de clavièr» que permet escriure amb los accents. Òsca a tots !