Resson d'Oc

L'omenatge de la Val Varacha a son poèta Tavio Cosio

Dimenge que ven 1er de junh, la val Varacha, dins las valadas occitanas d’Itàlia, rendarà un omenatge al poèta Tavio Cosio (1923-1989), organizat per l’associacion Tavio Cosio, la comuna e la Pro Loco del Mèl, amb la collaboracion de la Chambra d’Oc, l’associacion que promòu l’identitat occitana dins aquesta region d’Italia. Aqueste poèta èra nascut dins la plana, mas s’establiguèt coma farmacista al Mèl en 1962. Aprenguèt l’occitan (que parlava lo piemontés «vesin») e escriguèt una obra en occitan, en piemontés e en italian. L’omenatge de dimenge consistís en una passejada dins la val Varacha, la «Chaminada per li viòls dal Mèl, Valmala e Brossasc», puèi a 17 oras una evocacion de la figura del poèta per los escrivans Masino Anghilante e Franc Bronzat. A 19 oras serà lo cassa-crosta e la jornada s’acabarà amb l’espectacle Oc en chamin, del grop musical Aire de Prima, a 21 oras. Entresenhas sul siti de la Chambra d’Oc.

Article en français, cliquez ci-dessous.

De nòvas de Robert Lafont : un libre e un DVD

Robert Lafont, universitari e escrivan nascut a Nimes en 1923, es un actor magèr de la vida culturala occitana del mièg-sègle passat. A creat una obra del las considerablas : ficcion, poesia, teatre, ensags politics e istorics. Aquesta prima, ten una actualitat doble.

• L’Ideco, l’editor de l’Institut d’estudis occitans, ven de publicar La Cosmocritica, una evocacion de l’istòria de l’umanitat «de l’origina de la vida a l’Apocalipsi segon George W. Bush Jr». Prètz: 10€. Entà comandar : [email protected] ; telefòn : 05.63.75.22.26.
• Christian Passuello li avià consacrat un documentari de 52 minutas en 2001, Robert Lafont, un escrivan dins lo sègle, qu’ara se pòt crompar en DVD alprèp de l’autor (20€). Per comandar : [email protected]

Article en français, cliquez ci-dessous.

Fasetz coneissença amb las bestias de la festa occitana

Ven de paréisser Les animaux de la fête occitane, les totems du sud de la France, de Claude Alranq, illustrat per Vincent Roussillat. L’autor vòl «presentar las bestias de la festa occitana entà tornar a Lengadoc una polida pagina son patrimòni cultural». Lo libre descriu las originas diversas d’aquestes totems e las legendas que les enrodan. Editat per Editions du Mont. Contacte : [email protected] ; 4, carrièra Mistral, BP 15, 34370 Cazouls-lès-Béziers.

Article en français, cliquez ci-dessous.

"Max Rouquette, l'enchanteur", la mòstra del centenari se pausa un mes a Montpelhièr

La mòstra caminaira "Max Rouquette, l'enchanteur" s'installa fins al 8 de junh 2008 a Montpelhièr, en primièr a l'ostal de la comuna (fins al 23 de mai), puèi a la sala Saint-Ravy Comedia del Libre (del 24 de mai al 8 de junh). Aquesta mòstra, concebuda per l'associacion Amistats Max Rouquette dins l'encastre del centenari de la naissença del poèta desaparegut en 2005, evoca la vida e l'obra de Max Rouquette, son engatjament dins l'escritura e entà la defensa de la cultura d'òc, amb de testimoniatges, de fotòs d'archius, d'extrachs de l'obra e d'entetens amb l'autor.

Article en français, cliquez ci-dessous.

Un libre constata la vitalitat de las publicacions periodicas en occitan

Senhalem la publicacion recenta d’un libre en francés, Actes de résistance sociolinguistique - Les défis d’une production périodique militante en langue d’oc. L’autor, Carmen Alén Garabato, es cercaire a l’universitat Paul-Valéry de Montpelhièr. Aqueste obratge estudia diversas publicacions periodicas en occitan, sos redactors e sos legeires e constata una vitalitat tant vertadièra coma inesperada. Analisa aquestas iniciativas coma d’actes de resisténcia a l’uniformisacion culturala e coma de pròvas de leialtat lingüistica que se renovelan a cada generacion.

• Actes de résistance sociolinguistique - Les défis d’une production périodique militante en langue d’oc, Carmen Alén Garabato, Paris, L’Harmattan, 2008, 214 paginas, 20€.

Article en français, cliquez ci-dessous

Dos libres per comprene los rapòrts entre l'escòla e l'occitan

Las Premsas universitarias de la Miegterrana de l’universitat Paul Valéry de Montpelhièr an publicat recentament dos libres en francés qu’analisan los rapòrts entre l’escòla republicana e las lengas regionalas, e mai precisament, l’occitan als sègles XIX e XX.

• «L’école française et l’occitan. Le sourd et le bègue», de Philippe Martel, recampa d’articles sus l’actituda contradictoria de l’escola e de los regents cara a l’occitan, entre reprimida e compreneson (192 paginas, 15€).
• «L’école française et les langues régionales (XIXe-XXe siècles)», de Hervé Lieutard e Marie-Jeanne Verny, espandís la soscadissa a divèrsas regions francesas. Lo libre s’acompanha d’un DVD gratis, « Quel est ce charabia », una videò de testimoniatges rodada en Avairon (360 paginas, 20€).

Se voletz crompar aquestes obratges : [email protected] ; 04.99.63.69.25.

Article en français, cliquez ci-dessous.

Concors leterari annadièr de l'IEO vares

La seccion varesa de l'Institut d'estudis occitans, Provença Terra d'Oc, organisa lo son concors leterari  annal, dobèrt a totas las grafias. Dos prèmis seràn atribuats :

• lo prèmi Raynouard de la novèla : los candidats dévon escriure una novèla que comença atal : "Lo TGV lampava au beu mitan dei vinhas quora Helmut s'enaucèt : cercava la mar..."
• lo prèmi Alan Pelhon del conte : lo conte deu començar atal : "Aqueu jorn, Caramentrant (1+1=2) decidèt d'anar quèrre lo famos pòt-litic que balha lo poderos poder."

Cal que los candidats mànden lor tèxte (5 paginas A4 maximum) abans lo 30 setembre. Traparètz lo reglament çai-jós.

Téléchargement desplegant_2008.pdf

Article en Français, cliquez ci-dessous

Mirèio, la Provençala mai celèbra, a la conquista de Paris los 8 e 9 d'abrial

Del poèma famós de Frédéric Mistral (prémi Nobel de literatura en 1904, lo cal pas jamai doblidar), Mirèio, escrich en 1859, Charles Gounod avià fach un operà en 1864, que Michel Carré n'avià escrich lo libret amb l'aprovament del meteis Mistral. E aqueste operà es vengut un balet en 2004 mercès a la compania Ballet d'Europe de Jean-Charles Gil e a la transcripcion musicala de Raoul Lay. D'aquí perqué lo public parisenc podrà descobrir, senon l'òbra de Mistral, almens son eroïna mai celèbra los 8 e 9 d'abrial al prestigiós Théâtre du Châtelet.

Article en français, cliquez ci-dessous.

Lo present del Conselh General d'Aran per la Jornada mondiala de la poesia

Uèi, coma cada 21 de març, òm celebra la jornada mondiala de la poesia, organizada per l'Unesco. Entà participar a aquesta fèsta universala, lo departament de Cultura e Politica lingüistica del Conselh General d'Aran a causit de nos far present, amb l'autorisacion dels autors, d'una seleccion de vint poèmas en occitan que son estats premiats en Prèmi Aran de literatura. Les podètz legir sul siti oèb del Conselh General.

Traduction française, cliquez ci-dessous

D'aqueste man del jorn, lo novèl recuelh poetic de Joan Maria Petit

Ven de paréisser D’aqueste man del jorn, de Joan Maria Petit, cò de Letras d’Oc, dins una edicion bilingua occitan-francés. Aquò’s un recuelh de poësias ineditas de 176 paginas en tres parts : A de reng, Mai que mai, …e de la nuèit. L’autor, nascut en 1941, es originari d’Erau. A ja publicats mantunes recuelhs dempuèi 1965. Los dos darrièrs son estats Nòstra Dòna dels Espotits, en 2005, e Patarinas, en 2007, tanben çò de Letras d'Oc. Lo prètz de D'aquesta man del jorn es 20 €.