Dempuèi mai de dètz ans (1998 per èsser mai just, la primièra session se debanèt a Castras), los amoroses de la lenga occitana dins totas sas variantas, que pàrlen plan o que pàrlen pas, jòves o vielhs, se retroban un còp l’an, al mès de genièr, per far una dictada. Amb lo temps, lo rendètz-vos s’es espandit dins totes los cantons d’Occitània fins a venir la fèsta granda de la lenga. L'edicion 2010 de la Dictada se debanarà lo dissabte 30 de genièr. I aura de sessions pertot, de Niça fins a Milhau e de Foish fins a Montalban e quite a Barcelona.
L’Institut d’estudis occitans de Lengadòc prepausa aquesta tièra de vilas, qu'es luènh d'èsser exaustiva, ont se podrà participar : Niça (06), Foish (09), Puègnautièr (Ivernalas de Cabardés) e Narbona (11), Sant Africa e Milhau (12), Seteme (13), Charreç (16), Nimes (30), Carbona (31), Aush (32), Besièrs (34), Gintrac (46), Clarmont/Lende (63), Ortès (64), Ibos (65), Castras e Lo Sequèstre (81), Montalban (82), Carnolas (83).
Dins fòrça vilas, la dictada es tanben l'escasença de festejar, de veser d'espectacles, de mòstras, de partejar un moment de convivéncia altorn de la lenga, d'ausir l'occitan e de descobrir un tèxte literari.
Per los que se volon entraïnar, lo siti la Pòrta d'òc prepausa de jogar en linha amb una dictada pels pichons e una pels adults.
Commentaires