Trapatz un trabalh en occitan amb lo Servici de l'emplec

Una agéncia occitana per l'emplec acaba d'espelir a Tolosa, mercès a l'Institut d'estudis occitans. Se ditz lo Servici de l'emplec e es cargat d'organisar la rencontre entre los emplegaires e los demandaires d'emplec, amb una specifitat : tòca d'emplecs ont fa mestièr parlar occitan. Sul siti Internet del Servici de l'Emplec, se trapan d'ofèrtas per trabalhar dins tot l'espaci occitan, de conselhs practics pels demandaires d'emplec (bastir un CV, aprestar una entrevista...), un agendà de formacions en occitan.

Los demandaires d'emplec pòdon crear un compte sul siti, postular en linha, crear un alèrta mail amb de critèris de recèrca enregistrats. Per çò qu'es dels emplegaires, pòdon postar d'ofèrtas e consultar los perfils enregistrats. Lo Servici de l'emplec rensenha tanben sos utilizators per telefona.

A l'ora d'ara, lo Servici prepausa 9 ofèrtas, per exemple regent remplaçant dins la calandreta de Porciuvas (64), animator sus ràdio Lenga d'Oc, cargat de produccion e de desvolopament cultural dins Cantal o responsable del centre de difusion cultural de l'Ostal d'Occitània de Tolosa.

• Servici de l'Emplec : Institut d'estudis occitans, 11 carrièra Malcosinat, 31000 Tolosa (09.62.56.09.91).