Lo dissabte passat, 9 de febrièr, 150 a 200 personas simpatisantas de las diferentas associacions occitanas de Bearn manifestèron a Pau per demandar un local qu'abrige la tresena calandreta de l'aglomeracion e lo collègi calandreta a la dintrada de setembre 2008. Simbolicament, los calandrons e collegians bastiguèron lor collègi amb de cartons en presencia de los candidats a la comuna de Pau, François Bayrou, Martine Lignières-Cassou e Yves Urrieta, l'actual conse. Tots s'engatjèron a discutir per ajudar lo collègi a trobar un bastiment entà la dintrada. La municipalitat de Pau e lo conselh general son tanben pres a ajudar sia a crompar los locaus, sia a ajudar financiarament una aquisicion. Cai-jos l'apèl a manifestar.
Manifestacion de las escòlas e deu collègi CALANDRETA !
A la plaça Georges Clémenceau, a Pau
Dissabte 09 de heurèr de 2008 a 11h
Seteme de 2008 : Pas mei de locaus tau Collègi Calandreta !
Que hè 3 ans que lo Collègi Calandreta a ubèrt las soas pòrtas e en seteme de 2008, ne i averà pas mei nat locau pro gran tà arcuelhèr lo trentenat de mainats qui son escolarizats dens aqueste establiment.
Dinc au dia de uei, lo collègi que logava ua maisoeta de quate pèças, au 13 arrua Léonard Constant, a Pau. Aquestes locaus, au dia de uei que son tròp petits e non permetan pas l’arcuèlh deus collegians de la 6au a la 3au.
Las discussions dab los diferents representants de las collectivitats, n’an tostemps pas permetut de trobar locaus com cau. La màger part deus interlocutors que son favorables au projècte mes n’an pas concretizat nada solucion tà poder auherir un lòc d’ensenhament coërent de cap aus besonhs.
La tresau Calandreta de l’aglomeracion : la responsa a la hrèita qui'ns demandan !
Despuish la creacion de la purmèra Calandreta a Pau, que i a 28 ans, los efectius n’an pas deishat de pravar e que son per tròp conhits, si volem estar com cau dab la qualitat d’ensenhament qui defendem. Dab l’escòla de Lescar, qui ei la dusau Calandreta de l’aglomeracion, ne podem pas respóner a totas las demandas d’escolarizacion. Dens un periòd quan las politicas lingüisticas en favor de l’occitan e's hican en plaça, que devem estar en mesura de perpausar un ensenhament immersiu en occitan a mei de familhas.
Aquestes dus projèctes ne poden anar dinc au cap shens lo sostien de las collectivitats territoriaus.
A la manifestacion deu dissabte 9 de heurèr, que demandan :
- lo sostien d’un maximum de personas tà ns'ajudar a trobar d’urgéncia locaus tau collègi Calandreta, a la rentrada de 2008.
- la presa en compte de la construccion de locaus Calandreta, sus l’aglomeracion paulina qui permetan l’arcuelh d’ua tresau Calandreta, deu collègi e d’un Centre de Lesers Associat a l’Escòla.
Au parat d’aqueste manifestacion que serà balhat a l’ensemble deus elegits e candidats a las eleccions presents, publicament, un dossièr relatiu a d’aquestes projèctes.
Que v'invitam a portar simbolicament la vòsta pèira a l’edifica.
Que v'esperam tots dab un carton deus bèths tà bastir dab nosautes lo collègi Calandreta, lo dissabte 9 de heurèr, a 11h, a la plaça Clémenceau.
Qu'ei mei qu' important d’estar hèra numerós aqueth dia, entà aficar qu’èm tostemps presents tà sostiéner la lenga e las iniciativas en favor d’aquesta.
Entresenhas : Fédération Départementale des Calandretas- 05 59 68 68 73- [email protected]
Commentaires