Resson d'Oc

La Val d’Aran encoratja sos estajants a s’encontrar entà parlar en occitan

Lo departament de Cultura e Politica Lingüistica del Conselh General d’Aran a lançat lo Volontariat per Aranés, un programa per que las personas que conéisson basicament la lenga aranesa la pòscan parlar amb d’autras que la parlan acostumadament. Lo Volontariat per Aranés ajudarà las personas motivadas a s’encontrar. Las parelhas conversaran un minimòm de detz oras (ont, quora et de çò que vòlon). Aquesta politica s’inspira del Voluntariat per la llengua ja mes en plaça en Catalonia. Los apreneires e los tutors se dévon inscriure alprèp del Conselh General d’Aran. L'aranés, qu'es lenga oficiala dins la val d'Aran, es una varianta del gascon.

Article en français, cliquez ci-dessous.

Sota Òrme, l’associacion que vòl far viure lo gorbarin

Dempuèi le fin de l’annada passada, l’associacion Sota Òrme, afrairada a l’IEO-06, obra per promoure lo gorbarin, lo dialècte occitan que se parla a Gòrb (06). Demest sas embicions : far conéisser la plaça d’aqueste lenga dins l’occitan e sos ligams amb los parlars nissards, provençals e los autres parlars occitan. Tanben vòl encoratjar los estatjants de Gòrb a aprene e practicar aquesta lenga. Lo 8 de junh que ven, organiza una visita del vilatge en lenga gorbarina, gratis e doberta a totes. Informacions : Arlette Pastor : 6 carriera Garibaldi 06500 Gòrb ([email protected]).

Article en français, cliquez, ci-dessous.

Lo debat preparatiu de la manifestacion de 2009 se debanarà lo 27 d'abrial a Besièrs

Aprèp la capitada de las manifestacions de Carcassona (2005) e de Besièrs (2007) per defendre la plaça de la lenga dins l'ensenhament e los mediàs e sonque dins la societat (20.000 manifestants a Besièrs segon los organizators), lo comitat Anem Oc convida los simpatisaires de la causa occitana a tornar manifestar l'an que ven amb las meteissas reivindicacions. Per preparar aqueste rendètz-vos e soscar a los mejans de far viure la lenga, organiza un forum a Besièrs lo 27 d'abrial, per que totes los que volon pòscan participar a la reflexion collectiva. Mai informacions : [email protected]. Telefòn : 04.42.59.43.96.

Article en français, cliquez ci-dessous.

Eleccions municipalas e cantonalas : los resultas del Partit Occitan

I avià de candidats del Partit Occitan (autonomista) dins mantunas vilas e cantons per las eleccions municipalas e cantonalas de la dimenjada passada. Aquestes candidats eran presents per de listas d’union (subretot d’esquèrra mas tanben de dreta) que defendiàn la diversitat culturala e linguistica. Atal qu’aviam balhat la lista de los candidats, vaquí los resultas.

• Elegits conselhers municipals
  La Sanha de Mar (83) : Miquèu TOURNAN ; Aurenja (84) :  A.M. HAUTANT (1er torn) ; Ais de Provença (13) : Hervé GUERRERA ; Traussa-Menerbès (11) : J. F. SAISSET (1er torn) ; Sant Just de Viaur (12) : Josiana DAUNIS-MARTY (1er torn) ; Colombiés (12) : Patrick ALCOUFFE (1er torn) ; Sent Daunis-Catus (46) : Bernat RAFFY (1er torn) ; Gavaudun (47) : Pèire BOISSIERA (1er torn)

• Eleccions cantonalas (1er torn)
  Pena d'Agenés (47) : Ives BOISSIÈRA ; supleanta : Mathilde LACASSAGNE (sostenguts pels Verts) 10,6% ; La Vaur (81) :  Danièl RIFÀ ; supleanta : Benedicta PORTAL (sostenguts pels Verts) : 10,49% ; Vielmur (81) : Joan THOMAS ; supleanta Anna-Maria PUJÒL :7,51%

Article en français ci-dessous

L'Esquèma de Miegjorn-Pireneus per desvolopar l'occitan

Dins son darrier numero (febrièr-març de 2008), Midi-Pyrénées Info, lo jornal del Conselh regional de Miegjorn-Pireneus, presenta l’Esquèma regional de desvolopament de l’occitan (SRDO) que la region aprobèret lo 20 de decembre passat. Lo SRDO prevei d’encoratjar l’ensenhament e la formacion, la sensibilizacion a la lenga e lo devolopament d’otisses de communicacion, en collaboracion amb las associacions, los despartaments, las autras regions occitanas e l’Estat.

L'Occitània a pè : lo detalh de la caminada

Ja avèm parlat de l'iniciativa de La Chambra d'Oc, associacion que obra per lo reviscòl cultural et lingüistic de las valadas occitanas d'Italià, qu'organiza una caminada a travèrs tota l'Occitània per que l'occitan sià inscrit al patrimòni mondial de l'Unesco. L'associacion balha lo detalh del trajècte sus son siti Internet amb un pichon tèxte descriptiu per caduna de las 63 etapas. Publica tanben las nombròsas marcas de sosten qu'a recebudas de tota l'Europa. La caminada se debanara entre Vinai (Val d'Estura) e Vielha (Val d'Aran), del 30 d'agost al 7 de novèmbre e es doberta a tots.

Téléchargement trajecte_detalhat.pdf

Téléchargement per_aderir_a_lapel.pdf

Eleccions municipalas : Convergéncia Occitana constata un consensus per far viure le lenga e la cultura occitanas a Tolosa

Lo collectiu d’associacions Convergéncia Occitana fa un bilanç fòrça positiu de lo rencontre qu’organizèt lo 15 de febrièr passat amb los candidats a la comuna de Tolosa o sos represantants per parlar de la politica municipala en favor de la lenga e de la cultura occitanas. La sala del Senescal èra claufida e los candidats faguèron bon acuèlh a las proposicions de las associacions. Segon Jean-François Laffont, president de Convergénecia Occitana, l’escasuda d’aqueste rencontre prova que «la cultura occitana es venguda un enjòc cultural, mas tanben social e economic : lo de l’identitat culturala retrobada e afortida d’una vila e d’una encontrada.» Trobaretz çai-jos lo comunicat de Convergéncia Occitana en francès e en occitan.

Téléchargement convergencia_occitana.pdf

La senhalizacion bilingüe, un enjòc capital : l'exemple illustrat de Tolosa

Abans las eleccions municipalas, las associacions occitanas balhan lor messatge a los candidats de tots los partits. Demest lors demandas, l'installacion d'una senhalizacion publica bilingüe dins las ciutats de l'airal occitan (placas de carrièras, placas direccionalas, dintrada et sortida de vila...). Pòt far sorire d'unes, mas l'enjòc es capital.

Eleccions municipalas : los candidats e lo programa del Partit Occitan

Los autonomistas occitans participon a las eleccions municipalas dels 9 e 16 de març que ven. Lo Partit Occitan nos a mandat la lista de la comunas ont presenta de candidats (que coneisson a l'ora d'ara), dins tota l'Occitània, que publicam çai-jos. Tanben trobaretz çai-jos las proposicions municipalas d'aqueste partit.

Téléchargement programa_municipal.pdf

Municipalas a Tolosa : los electors e los candidats convidats a debatre sus lo tèma occitan lo 15 de febrièr

Amb las eleccions municipalas del 9 de març, los amoròs de la lenga e de la cultura occitanas tenon una oportunitat unica de far ausir lor votz. Lo collectiu Convergéncia Occitana, que recampa las associacions tolosencas de l’Ostal d’Occitània, convida los candidats al Capitòli a un debat dobert a tot lo monde sus aqueste tèma lo divendres 15 de febrièr a la Sala del Senescal de 18h a 19h30.

Téléchargement Propositions_pour_culture_occitane_Toulouse.pdf