Resson d'Oc

Las personas que vòlon participar a l'examen pel diplòma d'Escapolaire se devon inscriure abans lo 26 de mai

La session de l’examen pel diplòma d’Escapolaire, que valora un nivèl d’occitan, se debanarà lo 7 de junh. Demoran pas pus que qualques jorns per s’inscriure, que la data limita de retorn de las inscripcions es lo 26 de mai. L’examen s’adreiça tant als adults coma als mainatges de mai de 10 ans. L’examen es organizat pel Centre de formacion professionala occitan dins mantun endrechs :

• A Besièrs (lengadocian) dins los locals del Pòl de formacion occitan Aprene (Ostal de la vida associativa, 15 carrièra General-Margueritte) (entresenhas : 04.67.28.75.36 ; [email protected])
• A Montpelhièr (lengadocian) al Talhièr Parlar (Espaci Jacme 1èr d'Aragon, 117, carrièra dels Estats Generals) (entresenhas : 04.67.28.75.36 ; [email protected])
• A Tolosa a l’Ostal d’Occitània (05.61.23.99.51 ; [email protected])
• A Ortès (gascon), l’examen es lo 14 de juhn (05.59.67.20.75 ; [email protected])

Téléchargement Adults.pdf
Téléchargement 10-15_ans.pdf

Article en français, cliquez ci-dessous.

Setena Universitat occitana d'estiu de La Guépia del 12 al 19 de julhet

La setena Universitat occitana d'estiu  Lenga Viva de La Guépia (Tarn e Garona) se debanarà del 12 al 19 de julhet. Prepausa a l’encòp un estagi de lenga (corses per quatre nivèls cinc còps tres oras) e un festenal cultural e musical (conferéncias, taulejada, serada de contes amb Yves Rouquette, danças e cançons, teatre amb l’Aristofanada de La Rampe/TIO…). I aurà tanben una messa en occitan lo dissabte 13. Un acuelh es previst pels mainatges amb d’animacions divèrsas. Butletin d’inscripcion de cargar sul siti de Lenga Viva.

• Informacions : Associacion Mélodie Guépienne - Lenga Viva, ostal de vila de La Guépia, 82250 Laguépie ; telefòn : 05.63.30.20.81 ; [email protected].

Article en français, cliquez ci-dessous.

Una Calandreta a Paris ? Venètz ne discutir al estanquet lo 24 de mai

Benlèu que i aurà leu una escòla bilingüa calandreta a Paris. Es lo projècte dels utopics de Livia Perri, una occitana de Seta montada a la capitala. Vòldria que los pichons Parisencs que sos parents son originaris de l'airal occitan (e mai los autres !) pòscan aprene la lenga e la cultura  al costat de la francesa. L'escòla podrià dobrir sas pòrtas tre la dintrada de setembre 2009. Livia Perri convida las personas interessadas a discutir d'aqueste projècte ambiciós dissabte que ven 24 de mai a 14 oras a l'estanquet Le coeur couronné, plaça dels Innocents (barri de las Halles, 1er arrondiment). Contacte : [email protected].

Article en français, cliquez ci-dessous.

Lo govèrn refuta la ratificacion de la Carta europea mas promet una lei

Dimecres passat 7 de mai se debanèt a l'Assemblada nacionala un debàt sens vòte sus las lengas regionalas — dins l'indiferéncia generala de la clasa politica e dels mediàs, cal confessar. La ministra de Justicia, Rachida Dati, l'avià promes en genièr quora l'Assemblada ratifiquèt lo novèl tractat europeu. Atal que se podià pensar, lo govèrn, per la votz de Christine Albanel, ministra de Cultura, anoncèt que ratificarià pas la Carta europea de las lengas regionalas, "contraria a nostres principis". En cambi, prometèt un "tèxte de lei", entà dessenhar "un encastre de referença" per "dobrir un espaci d'expression mai larg" a las lengas regionalas. Veirem ben.

Téléchargement debat_assemblee.pdf

Article en français, cliquez ci-dessous.

La Val d’Aran encoratja sos estajants a s’encontrar entà parlar en occitan

Lo departament de Cultura e Politica Lingüistica del Conselh General d’Aran a lançat lo Volontariat per Aranés, un programa per que las personas que conéisson basicament la lenga aranesa la pòscan parlar amb d’autras que la parlan acostumadament. Lo Volontariat per Aranés ajudarà las personas motivadas a s’encontrar. Las parelhas conversaran un minimòm de detz oras (ont, quora et de çò que vòlon). Aquesta politica s’inspira del Voluntariat per la llengua ja mes en plaça en Catalonia. Los apreneires e los tutors se dévon inscriure alprèp del Conselh General d’Aran. L'aranés, qu'es lenga oficiala dins la val d'Aran, es una varianta del gascon.

Article en français, cliquez ci-dessous.

Dos libres per comprene los rapòrts entre l'escòla e l'occitan

Las Premsas universitarias de la Miegterrana de l’universitat Paul Valéry de Montpelhièr an publicat recentament dos libres en francés qu’analisan los rapòrts entre l’escòla republicana e las lengas regionalas, e mai precisament, l’occitan als sègles XIX e XX.

• «L’école française et l’occitan. Le sourd et le bègue», de Philippe Martel, recampa d’articles sus l’actituda contradictoria de l’escola e de los regents cara a l’occitan, entre reprimida e compreneson (192 paginas, 15€).
• «L’école française et les langues régionales (XIXe-XXe siècles)», de Hervé Lieutard e Marie-Jeanne Verny, espandís la soscadissa a divèrsas regions francesas. Lo libre s’acompanha d’un DVD gratis, « Quel est ce charabia », una videò de testimoniatges rodada en Avairon (360 paginas, 20€).

Se voletz crompar aquestes obratges : [email protected] ; 04.99.63.69.25.

Article en français, cliquez ci-dessous.

La fèsta de las Calandretas se debanarà del 7 al 10 de mai en Bearn

Lo congrès de la Confederacion de las escòlas occitanas Calandretas, que recampa 46 escòlas primàrias e 2 collègis dins tot l'airal ocitan, se debanarà de 7 al 10 de mai dins la valada d'Ossau, a Vièla e Laruntz. Pendant quatre jorns, serà l'escasença d'encontres, d'escambis e de concèrts. Vaquì lo programa dels espectacles :

• Dijòus 8 de mai, 19h30 al gimnasi de Laruntz : "Viatge en lenga", espectacle de las Escòlas Calandretas e bilingüas amb Joan-Francés Tisnèr e Roman Baudoin ; "Rugbi", creacion musicala e artistica de Joan-Francés Tisnèr e Lionel Dubertrand ; "Pakopolen", grop occitan de Gasconha (5 euros).
• Divendres 9 de mai, 21h al gimnasi de Laruntz : "La mal coiffée", grop occitan de Lengadoc ; "Monesi", grop occitan de Bearn ; "Amaren Alabak", grop basc ; bal amb Mossur Artús, grop occitan de Gaconha (5 euros).

Mai informacions : [email protected] ; tel. : 05.59.68.68.73.

Article en français, cliquez ci-dessous

A fum cap a l'òc à Ferrals-Corbières del 22 al 25 d'abrial

Ferrals-Corbières, dins lo departament d'Aude, viurà a l'ora occitana en abrial. Del 23 al 25, lo Centre de formacion professionala occitan (CFPO) e l'Institut d'estudis occitans-Aude organizan un estagi Parlar altorn del tèma Vinhas e garrigas. Aquesta session d'aprendissatge de la lenga e de la cultura s'adreça tant a los començaires coma a los que parlan ja la lenga. Serà tanben l'escasença d'activitats culturalas e convivialas diversas : mòstra, espectacles, taulejadas, bals... Vos cal inscriure abans lo 15 d'abrial (vesètz çai-jós). Lo Programa PARLAR es una operacion que se realiza amb lo sosten financièr de la Region Lengadòc-Rosselhon, l’ajuda del ministèri de la Cultura e de la Comuncicacion e de la comuna de Montpelhièr. L’estagi de Ferrals a lo sosten del Conselh general d’Aude, del País Corbièras & Menerbés e de la Comunautat de Comunas de la Region de Lesinhan.

Communiqué et programme en français, cliquez ci-dessous

Revisatz los rudiments de la lenga mercès al CRDP de Montpelhièr

Uèi senhalam un ligam indispensable entà los començaires e mai los que vòlon tornar aprene los rudiments de l'occitan. Lo CRDP de Montpelhièr prepausa sus son siti «Dire en òc», un metòd d’aprendissatge de la lenga elaborat en collaboracion amb l’Université Paul-Valéry.

Es partit en vint e cinc leiçons o unitats, amb de fichas gramaticalas, exercicis d’escota e de revirada, lectura de pichons tèxtes estrachs de Setembralas, de Joan Frederic Brun (IEO, 1994). L’avèm esprovat e nos agrada tant qu’anam seguir totas las unitats !

Pour lire cette note en français, cliquez ci-dessous

Eleccions municipalas e cantonalas : los resultas del Partit Occitan

I avià de candidats del Partit Occitan (autonomista) dins mantunas vilas e cantons per las eleccions municipalas e cantonalas de la dimenjada passada. Aquestes candidats eran presents per de listas d’union (subretot d’esquèrra mas tanben de dreta) que defendiàn la diversitat culturala e linguistica. Atal qu’aviam balhat la lista de los candidats, vaquí los resultas.

• Elegits conselhers municipals
  La Sanha de Mar (83) : Miquèu TOURNAN ; Aurenja (84) :  A.M. HAUTANT (1er torn) ; Ais de Provença (13) : Hervé GUERRERA ; Traussa-Menerbès (11) : J. F. SAISSET (1er torn) ; Sant Just de Viaur (12) : Josiana DAUNIS-MARTY (1er torn) ; Colombiés (12) : Patrick ALCOUFFE (1er torn) ; Sent Daunis-Catus (46) : Bernat RAFFY (1er torn) ; Gavaudun (47) : Pèire BOISSIERA (1er torn)

• Eleccions cantonalas (1er torn)
  Pena d'Agenés (47) : Ives BOISSIÈRA ; supleanta : Mathilde LACASSAGNE (sostenguts pels Verts) 10,6% ; La Vaur (81) :  Danièl RIFÀ ; supleanta : Benedicta PORTAL (sostenguts pels Verts) : 10,49% ; Vielmur (81) : Joan THOMAS ; supleanta Anna-Maria PUJÒL :7,51%

Article en français ci-dessous