Resson d'Oc

Setena Universitat occitana d'estiu de La Guépia del 12 al 19 de julhet

La setena Universitat occitana d'estiu  Lenga Viva de La Guépia (Tarn e Garona) se debanarà del 12 al 19 de julhet. Prepausa a l’encòp un estagi de lenga (corses per quatre nivèls cinc còps tres oras) e un festenal cultural e musical (conferéncias, taulejada, serada de contes amb Yves Rouquette, danças e cançons, teatre amb l’Aristofanada de La Rampe/TIO…). I aurà tanben una messa en occitan lo dissabte 13. Un acuelh es previst pels mainatges amb d’animacions divèrsas. Butletin d’inscripcion de cargar sul siti de Lenga Viva.

• Informacions : Associacion Mélodie Guépienne - Lenga Viva, ostal de vila de La Guépia, 82250 Laguépie ; telefòn : 05.63.30.20.81 ; [email protected].

Article en français, cliquez ci-dessous.

La fèsta de las Calandretas se debanarà del 7 al 10 de mai en Bearn

Lo congrès de la Confederacion de las escòlas occitanas Calandretas, que recampa 46 escòlas primàrias e 2 collègis dins tot l'airal ocitan, se debanarà de 7 al 10 de mai dins la valada d'Ossau, a Vièla e Laruntz. Pendant quatre jorns, serà l'escasença d'encontres, d'escambis e de concèrts. Vaquì lo programa dels espectacles :

• Dijòus 8 de mai, 19h30 al gimnasi de Laruntz : "Viatge en lenga", espectacle de las Escòlas Calandretas e bilingüas amb Joan-Francés Tisnèr e Roman Baudoin ; "Rugbi", creacion musicala e artistica de Joan-Francés Tisnèr e Lionel Dubertrand ; "Pakopolen", grop occitan de Gasconha (5 euros).
• Divendres 9 de mai, 21h al gimnasi de Laruntz : "La mal coiffée", grop occitan de Lengadoc ; "Monesi", grop occitan de Bearn ; "Amaren Alabak", grop basc ; bal amb Mossur Artús, grop occitan de Gaconha (5 euros).

Mai informacions : [email protected] ; tel. : 05.59.68.68.73.

Article en français, cliquez ci-dessous

Una serada de teatre occitan a Tolosa lo 11 d'abrial altorn de Max Rouquette e Frederic Cayrou

Una serada de mancar pas pels apassionats del teatre d'òc lo 11 d'abrial a 21 oras al Théâtre des Mazades de Tolosa. La compania tolosana Comèdia Occitana Tolzana jogarà Sortilègis per rire, un ensem de doas comèdias : L'Endevinhaire, de Max Roqueta (amb David Geurten, Henriette Surin e Hubert Servan, mesa en scèna de Maurici Andrieu), e Lo Sorcièr repentit, de Frederic Cayrou (amb Henriette Surin, Josiane Victoria, Hubert Servan, Maurici Andrieu, David Geurten e Philippe Carbona, mesa en scèna del Fogal rural d'Aureville e Maurici Andrieu). Informacions :

• Théâtre des Mazades : 10, avenguda dels Mazades, Tolosa ; 05.34.40.40.10
• Comèdia Occitana Tolzana : 5 carrièra Françoise Aubry, 31500 Tolosa ; 05.61.11.88.76 ; [email protected]

Article en Français, cliquez ci-dessous.

Mirèio, la Provençala mai celèbra, a la conquista de Paris los 8 e 9 d'abrial

Del poèma famós de Frédéric Mistral (prémi Nobel de literatura en 1904, lo cal pas jamai doblidar), Mirèio, escrich en 1859, Charles Gounod avià fach un operà en 1864, que Michel Carré n'avià escrich lo libret amb l'aprovament del meteis Mistral. E aqueste operà es vengut un balet en 2004 mercès a la compania Ballet d'Europe de Jean-Charles Gil e a la transcripcion musicala de Raoul Lay. D'aquí perqué lo public parisenc podrà descobrir, senon l'òbra de Mistral, almens son eroïna mai celèbra los 8 e 9 d'abrial al prestigiós Théâtre du Châtelet.

Article en français, cliquez ci-dessous.

L'Eurovision de las lengas minoritarias cerca de candidats abans lo 1er de mai

Lo 18 d'octobre que ven, la vila suèca de Lulea aculhirà lo cinquen concors Liet-Lavlut de cançon en lengas minoritarias europeas, que clausarà un festenal de tres jorns (del 15 al 18 d'octobre) que i aurà tanben de conferencias (una sus lo desen aniversari de la carta de las lengas, organizada per lo Conselh d'Europa, autra sus las lengas minoritarias e la musica) e de concerts. I a encara quatre a sieis plaças per de grops que cantan de cançons originalas (aquò's pas un concors de cant tradicional). Los candidts devon mandar un CD abans lo 1er de mai. Traparètz  los detalhs de tots dins lo comunicat oficial çai-jos. La cantaire occitana Liza, que ja n'avèm parlat sus aqueste siti, avià ganhat lo primièr prèmi del public de la darrièra edicion, en 2006. Informacions : Birger Winsa, coordenatora del Liet-Lavlut, Rapsodivägen 48
S-142 41 Skogås, Suècia (00 46 (0)73 932 83 30 / 00 46 87 71 93 70 /[email protected]).

Communiqué officiel en français ci-dessous

Los amorós del libre occitan an rendètz-vos a Escritura 2008

Lo dimenge 6 d'abrial, lo famòs vilatge del libre d'Aude, Montolieu, aculhirà la setzena edicion d'Escritura, lo grand mercat de l'escrit occitan, catalan e regional. Los visitors podran trapar libres de los editors seguents : IEO (Ideco, IEO-11), Adeo, Creo-Provença, Letras d'Oc, Le Moustier, CDDP-Sceren e Vent Terral. Tanben i aurà un mercat del terrador e un fum d'animacions divèrsas : musica, jòcs, conferéncias, mòstras (una que ja n'avèm parlat a prepaus del centenari de Max Rouquette, autra d'Anna Réby qu'a complit lo dessenh qu'illustra aqueste articolet) e per acabar una tasta de vin. Trobaretz çai-jos lo programa detalhat (que pòt i aver de modificacions)

La mediatèca de Rodés celebra la Prima occitana

Durant lo mes de març, la Prima occitana se debana a la mediatèca de la vila de Rodés. Aqueste festenal prepausa una conferença, de lecturas, una exposicion, d’espectacles e la projeccion d’un film. Vaqui lo program, qu’es estat elaborat amb lo sosten de l’Institut d’estudis occitans d’Avairon e lo Centre cultural occitan de Roèrgue e qu’avèm trobat sul siti de la comuna de Rodés.

Al Printemps des poètes 2008, los poètas se festejan tanben en occitan

A l'escasença del desen Printemps des poètes, que se debana duscas al 16 de març pertot en França, cal senhalar doas manifestacions en occitan organizadas a Montpelhier. Dijòus 6, lo poèta Jean-Luc Sauvaigo presentarà son recuelh Compendi derisori dau desidèri. Divendres 7 l'espectacle «Paroles pour le vent» rendrà un omenatge al grand poèta contemporanéu Max Rouquette. Aquò remembra un còp de mai que nòstra lenga, qu'es estada una lenga màger d'expression poëtica dempuei l'Edat Mejana, o demora al segle XXI.

Teatre : Aristofanada, femnas al poder, la novèla creacion de La Rampe/TIO

La compania teatrala occitana La Rampe/TIO prepara un novèl espectacle per la debuta d'abrial. Aristofanada, femnas al poder, una peça de Marceau Esquieu mesa en scèna per Claude Alranq, serà jogada al teatre La Vista de Montpèlhier los 3, 4, 5, 6, 1O, 11 e 12 d'abrial (barri Figuerolle, 42 carriera Adam de Craponne) e lo 8 d'abrial al fugal municipal de Mesa (Mèze, Erau). Marceau Esquieu s'inspirèt del dramaturg grèc Aristofana per escriure un tèxt que se trufa del "biais mascle" de bailejar la ciutat amb umor e fantasià. L'espectacle serà jogat en occitan, amb de subretitols en francès.