Resson d'Oc

Fasetz coneissença amb las bestias de la festa occitana

Ven de paréisser Les animaux de la fête occitane, les totems du sud de la France, de Claude Alranq, illustrat per Vincent Roussillat. L’autor vòl «presentar las bestias de la festa occitana entà tornar a Lengadoc una polida pagina son patrimòni cultural». Lo libre descriu las originas diversas d’aquestes totems e las legendas que les enrodan. Editat per Editions du Mont. Contacte : [email protected] ; 4, carrièra Mistral, BP 15, 34370 Cazouls-lès-Béziers.

Article en français, cliquez ci-dessous.

Lo govèrn refuta la ratificacion de la Carta europea mas promet una lei

Dimecres passat 7 de mai se debanèt a l'Assemblada nacionala un debàt sens vòte sus las lengas regionalas — dins l'indiferéncia generala de la clasa politica e dels mediàs, cal confessar. La ministra de Justicia, Rachida Dati, l'avià promes en genièr quora l'Assemblada ratifiquèt lo novèl tractat europeu. Atal que se podià pensar, lo govèrn, per la votz de Christine Albanel, ministra de Cultura, anoncèt que ratificarià pas la Carta europea de las lengas regionalas, "contraria a nostres principis". En cambi, prometèt un "tèxte de lei", entà dessenhar "un encastre de referença" per "dobrir un espaci d'expression mai larg" a las lengas regionalas. Veirem ben.

Téléchargement debat_assemblee.pdf

Article en français, cliquez ci-dessous.

La Setmana n° 662 fa lo punt sus las soscadissas del forum Anem Oc

Tanben dins lo setmanièr del 8 de mai, las criticas de l'ONU a prepaus del repècte de las diversitats en França. Vaquí lo somari :

• Refusan l’arrogància de França, p. 2
• Anem Òc !, pp. 3, 4 e 5
• Pas de lenga irlandesa pels vòls cap a Belfast, p. 5
• França protegís la diversitat culturala sul papièr, p. 6
• Papagai arriba aus mainatges d'Aran, p. 7
• AG de l’IEO, p. 8
• Sortida botanica en occitan, p. 9
• Los « Gavaches » d’Aquitània, p. 10
• Rencontres de la cançon a Mesa, p. 11
• L’escorreguda per la lenga bretona, p. 12

Prètz : 1,5€ per numeró, 75,50€ l'abonament annal. L'editor n'es Vistedit.

Sommaire en français ci-dessous

"Max Rouquette, l'enchanteur", la mòstra del centenari se pausa un mes a Montpelhièr

La mòstra caminaira "Max Rouquette, l'enchanteur" s'installa fins al 8 de junh 2008 a Montpelhièr, en primièr a l'ostal de la comuna (fins al 23 de mai), puèi a la sala Saint-Ravy Comedia del Libre (del 24 de mai al 8 de junh). Aquesta mòstra, concebuda per l'associacion Amistats Max Rouquette dins l'encastre del centenari de la naissença del poèta desaparegut en 2005, evoca la vida e l'obra de Max Rouquette, son engatjament dins l'escritura e entà la defensa de la cultura d'òc, amb de testimoniatges, de fotòs d'archius, d'extrachs de l'obra e d'entetens amb l'autor.

Article en français, cliquez ci-dessous.

Los forums occitans s'espandisson sul oèb

Ja avèm parlat mai d'un còp del forum Occitania !, plan actiu e convivial, amb 135 membres marcats e mai de 5800 messatges mandats. S'i parla de totes los subjèctes que concernon la lenga e la cultura d'òc. Es pas solet que i a tanben lo forum d'Occitania.org, de la val d'Aran, amb 81 sòcis e gaireben 2000 messatges. I a encara lo del collectiu d'associacions tolosanas Convergencia occitana. Senhalem par acabar lo forum d'Ossau.net qu'acuhlis una seccion en bearnés, amb 1085 sòcis. Lo siti es especialisat sus la val d'Aussau, mas sul forum las discutidas son mai generalas. Una lista de completar...

Article en français, cliquez ci-dessous.

La Setmana n° 661 questiona sul sosten de França a Quebèc

Tanben dins lo setmanièr del 1 de mai, la soscadissa de los Occitans abans lo debàt del 7 de mai a l'Assamblada Nacionala. Vaquí lo somari :

• Tension creis en Bolivia, p. 2
• França es un paradís de la diversitat lingüistica, p. 3
• La Francofonia s’interròga, p. 4
• Sent Castin, lo baron deus sauvatges, p. 5
• L’Occitània a pè, p. 6
• Anem Òc ! en 2009, p. 7
• En Aran cèrcan volontaris per la lenga, p. 8
• Un pòste per l’occitan menaçat en Provença, p. 9
• La Santa Estela 2008 en Nauta Provença, p. 10
• Gramatica occitana, p. 11
• Rugbi, p. 12

Prètz : 1,5€ per numeró, 75,50€ l'abonament annal. L'editor n'es Vistedit.

Sommaire en français ci-dessous

Un libre constata la vitalitat de las publicacions periodicas en occitan

Senhalem la publicacion recenta d’un libre en francés, Actes de résistance sociolinguistique - Les défis d’une production périodique militante en langue d’oc. L’autor, Carmen Alén Garabato, es cercaire a l’universitat Paul-Valéry de Montpelhièr. Aqueste obratge estudia diversas publicacions periodicas en occitan, sos redactors e sos legeires e constata una vitalitat tant vertadièra coma inesperada. Analisa aquestas iniciativas coma d’actes de resisténcia a l’uniformisacion culturala e coma de pròvas de leialtat lingüistica que se renovelan a cada generacion.

• Actes de résistance sociolinguistique - Les défis d’une production périodique militante en langue d’oc, Carmen Alén Garabato, Paris, L’Harmattan, 2008, 214 paginas, 20€.

Article en français, cliquez ci-dessous

Un collòqui sus «L'occitan, lenga del trabalh e de la vida vidanta» los 23 e 24 de mai a Lemòtges

Lo Centre Trobar e l’Institut d’estudis occitans de Lemosin organisan un collòqui sus «L’occitan, lenga del trabalh e de la vida vidanta (sègles XII-XXI)». Se debanarà a Lemòtges los 23 e 24 de mai, a l’ostal de la region Lemosin. Segon los organisators, «un quinzenat d’especialistes e d’universitaris de renomenada internacionala se rescontraràn altorn de la lenga occitana». Las personas interessadas se devon inscriure, l’inscripcion es gratis. Traparetz lo programa çai-jós.

Téléchargement colloque_trobar_2008.pdf

• Mai informacion : Centre Trobar, Pôle culturel troubadour limousin, 20, rue Michelet, 19200 Ussel. Tel. e fax : 05.55.72.80.83 ; [email protected]

Article en français, cliquez ci-dessous.

La Val d’Aran encoratja sos estajants a s’encontrar entà parlar en occitan

Lo departament de Cultura e Politica Lingüistica del Conselh General d’Aran a lançat lo Volontariat per Aranés, un programa per que las personas que conéisson basicament la lenga aranesa la pòscan parlar amb d’autras que la parlan acostumadament. Lo Volontariat per Aranés ajudarà las personas motivadas a s’encontrar. Las parelhas conversaran un minimòm de detz oras (ont, quora et de çò que vòlon). Aquesta politica s’inspira del Voluntariat per la llengua ja mes en plaça en Catalonia. Los apreneires e los tutors se dévon inscriure alprèp del Conselh General d’Aran. L'aranés, qu'es lenga oficiala dins la val d'Aran, es una varianta del gascon.

Article en français, cliquez ci-dessous.

Los darrièrs desvolopaments de la politica lingüitica dins la Setmana n° 660

Tanben dins lo setmanièr del 24 d'abrial, la descobèrta de vestigis antics a Nimes. Vaquí lo somari :

• Aimé Césaire, p. 2
• Biocarburants, p. 3
• Un debat sus las lengas a l’Assemblada Nacionala, p. 4
• Per un estatut de las lengas de França, p. 5
• Tresaurs de Nimes, pp. 6 e 7
• L’acadèmia de Clarmont bofa lo caud e lo freg, p. 8
• L’ensenhament en basc mancarà de pòstes, p. 9
• Lo pavilhon de las Lanas de Gasconha hè entrar la lenga, p. 10
• L’UMP colhonada, Rugbi, p. 12

Prètz : 1,5€ per numeró, 75,50€ l'abonament annal. L'editor n'es Vistedit.

Sommaire en français ci-dessous