Resson d'Oc

Eleccions municipalas e cantonalas : los resultas del Partit Occitan

I avià de candidats del Partit Occitan (autonomista) dins mantunas vilas e cantons per las eleccions municipalas e cantonalas de la dimenjada passada. Aquestes candidats eran presents per de listas d’union (subretot d’esquèrra mas tanben de dreta) que defendiàn la diversitat culturala e linguistica. Atal qu’aviam balhat la lista de los candidats, vaquí los resultas.

• Elegits conselhers municipals
  La Sanha de Mar (83) : Miquèu TOURNAN ; Aurenja (84) :  A.M. HAUTANT (1er torn) ; Ais de Provença (13) : Hervé GUERRERA ; Traussa-Menerbès (11) : J. F. SAISSET (1er torn) ; Sant Just de Viaur (12) : Josiana DAUNIS-MARTY (1er torn) ; Colombiés (12) : Patrick ALCOUFFE (1er torn) ; Sent Daunis-Catus (46) : Bernat RAFFY (1er torn) ; Gavaudun (47) : Pèire BOISSIERA (1er torn)

• Eleccions cantonalas (1er torn)
  Pena d'Agenés (47) : Ives BOISSIÈRA ; supleanta : Mathilde LACASSAGNE (sostenguts pels Verts) 10,6% ; La Vaur (81) :  Danièl RIFÀ ; supleanta : Benedicta PORTAL (sostenguts pels Verts) : 10,49% ; Vielmur (81) : Joan THOMAS ; supleanta Anna-Maria PUJÒL :7,51%

Article en français ci-dessous

Bartàs, la musica mestissada de Mauresca Fracas Dub

Aprèp Francament (2003) e Contèsta (2005), vaquí Bartàs. Lo grop de raggamuffin sound system occitan, o trobamuffin, Mauresca Fracas Dub sortirà son tresen album aqueste mes d’abrial : «quatòrte títols entà festejar, de tèxtes militants en occitan e en frances. Parlar d'aicí e dobrir la cultura occitana al monde». Los cinc musicaires montpelhierencs son dins la linha del ragga balèti inventat a Marselha, «luònh de la world-music-mercandisa e dau repleg identitari, dins la fèsta e l’esperit d’un grand carnaval sensa frontièras». Entà festejar la sortida de Bartàs, Mauresca Fracas Dub balharà un concert gratis lo 27 de març al Rockstore e Montpelhièr.

D'aqueste man del jorn, lo novèl recuelh poetic de Joan Maria Petit

Ven de paréisser D’aqueste man del jorn, de Joan Maria Petit, cò de Letras d’Oc, dins una edicion bilingua occitan-francés. Aquò’s un recuelh de poësias ineditas de 176 paginas en tres parts : A de reng, Mai que mai, …e de la nuèit. L’autor, nascut en 1941, es originari d’Erau. A ja publicats mantunes recuelhs dempuèi 1965. Los dos darrièrs son estats Nòstra Dòna dels Espotits, en 2005, e Patarinas, en 2007, tanben çò de Letras d'Oc. Lo prètz de D'aquesta man del jorn es 20 €.

La Setmana n°654 analisa lo primièr torn de las elecions municipalas e cantonalas

Lo setmanièr del 13 de març s'interessa tanben a la reflexion a l’entorn d’Anem Oc e de la manifestacion per la lenga prevista en 2009. Vaquí lo somari :

• Municipalas a Niça, p. 2
• Manifestacion per la lenga irlandesa a Belfast, p. 3
• Anem Òc ! Endavant !, p. 4
• Lo Quebequeses parlan mai lo francés al trabalh, p. 5
• Municipalas en Occitània, pp. 6 e 7
• Se cal mesfisar del silenci, p. 8
• Las lengas se practican de mantuns biaisses, p. 9
• La lenga deu èstre presenta en defòra de l’escòla, p. 10
• Èra l’an 1244, p. 12

Prètz : 1,5€ per numeró, 75,50€ l'abonament annal. L'editor n'es Vistedit.

Un collòqui consacrat a la poesia contemporanea los 3 e 4 d'abrial a Montpelhièr

Dins l'encastre de la commemoracion del centenari de Max Rouquette (1908-2005), la còla RedOc-Etoill de l'universitat Paul-Valéry de Montpellhièr organiza un collòqui sus lo reviscòl del trobar occitan entre 1930 e 1960, altorn de la figura centrala del grand poèta. Titolat "Max Rouquette et le renouveau de la poésie occitane - La poésie d’oc dans  le concert des écritures européennes (1930-1960)", aqueste collòqui se debanarà los 3 e 4 d'abrial a la mediatèca Emile Zola de Montpelhièr e promet d'èstre passionnant. Traparètz lo programa detalhat sus lo siti de l'Associacion Amistats Max Rouquette.

Los amorós del libre occitan an rendètz-vos a Escritura 2008

Lo dimenge 6 d'abrial, lo famòs vilatge del libre d'Aude, Montolieu, aculhirà la setzena edicion d'Escritura, lo grand mercat de l'escrit occitan, catalan e regional. Los visitors podran trapar libres de los editors seguents : IEO (Ideco, IEO-11), Adeo, Creo-Provença, Letras d'Oc, Le Moustier, CDDP-Sceren e Vent Terral. Tanben i aurà un mercat del terrador e un fum d'animacions divèrsas : musica, jòcs, conferéncias, mòstras (una que ja n'avèm parlat a prepaus del centenari de Max Rouquette, autra d'Anna Réby qu'a complit lo dessenh qu'illustra aqueste articolet) e per acabar una tasta de vin. Trobaretz çai-jos lo programa detalhat (que pòt i aver de modificacions)

Max Rouquette (1908-2005), las mòstras del centenari

Max Rouquette, que foguèt un escrivan màger del segle XX, desaparegut en 2005, aurià fach cent ans ongan. Aqueste aniversari serà festejat durant tota l'annada mercès a l'associacion Amistats Max Rouquette qu'organiza una seria d'eveniments a l'entorn de l'òbra del poèta : conferencias, exposicions, edicions novelas, espectacles... Resson d'Oc presentarà las manifestacions a mesura del desbanament del centenari. Uèi parlarèm de las tres mòstras previstas.

La Mal coiffée, sièis joves femnas dins lo vent

Trapat sus Youtube, aqueste reportatge del jornal de Jean-Pierre Pernaut consacrat al grop audenc La Mal Coiffée lo 8 de febrièr passat. Aquò's pas tan frequent d'ausir de polifonias occitanas sus TF1. Aprofechem !

Palmarés del primièr festenal videò «Le midi en images»

Lo primièr festenal de videò amator «Le midi en images» se debanèt los 1 e 2 de març a Saint-Gervasy (fotò), dins lo departament de Gard. Dos associacions l’organizèron : Rayons d’Oc e Les amis de Télé-Miroir. 18 videòs son estadas presentadas a la jurada dins diferentas categorias : ficcion, reportatge e animacion, en francès o en occitan. La competicion èra doberta a tots, amb una condicion imperativa : que la videò sià rodada dins l’airal occitan. La jurada devià jutjar lo tèma causit, las qualitats tecnicas e lo comentari.  Vaquí lo palmarés que nos balhèt Rayons d'Oc… en esperar l'edicion de l'an que ven.

Un grand dorsièr sus las eleccions municipalas e cantonalas dins La Setmana n° 653

Lo setmanièr del 6 de març s'interessa tanben a nòstres vesins europencs. Vaquí lo somari :

• Eleccions espanhòla, p. 2
• La crisi bèlga reportada, p. 3
• Eleccions cantonalas : l'enjòc dels departaments, p. 4
• Lo jòc politic subtil de las comunas petitas, p. 5
• Silvan Pastor, l’embolhaire de Nimes, p. 6
• Un maire occitanista, sèt ans après., p. 7
• 600 quilomètres per la lenga bretona, p. 8
• Manifestavan contra l’incinerator marselhés, p. 10
• Lo lop qu'ei tornat aus Pirenèus, p. 12

Prètz : 1,5€ per numeró, 75,50€ l'abonament annal. L'editor n'es Vistedit.