Resson d'Oc

L'Occitània a pè : lo detalh de la caminada

Ja avèm parlat de l'iniciativa de La Chambra d'Oc, associacion que obra per lo reviscòl cultural et lingüistic de las valadas occitanas d'Italià, qu'organiza una caminada a travèrs tota l'Occitània per que l'occitan sià inscrit al patrimòni mondial de l'Unesco. L'associacion balha lo detalh del trajècte sus son siti Internet amb un pichon tèxte descriptiu per caduna de las 63 etapas. Publica tanben las nombròsas marcas de sosten qu'a recebudas de tota l'Europa. La caminada se debanara entre Vinai (Val d'Estura) e Vielha (Val d'Aran), del 30 d'agost al 7 de novèmbre e es doberta a tots.

Téléchargement trajecte_detalhat.pdf

Téléchargement per_aderir_a_lapel.pdf

La Setmana del 28 de febrièr s'interessa a Lorda amb los 150 ans de las aparicions

Tanben dins lo setmanièr n° 652, l'afar que menaça lo siti Gavarnia-Mont Perdut d'esser retirat de la lista del patrimòni de l'Unesco. Vaquí lo somari :

• Gavarnia risca d’èstre desqualificat, pp. 2 e 3
• Los alsacians perdon la lenga e lo trabalh, p. 4
• Las bordilhas dins la campanha electorala marselhesa, p. 5
• Lorda festeja Bernadeta e las aparacions de 1858, pp. 6, 7 e 8
• Diccionari francés-gallo, p. 9
• Lo quotidian Egunkaria es tancat dempuèi cinc ans, p. 12

Prètz : 1,5€ per numeró, 75,50€ l'abonament annal. L'editor n'es Vistedit.

Eleccions municipalas : Convergéncia Occitana constata un consensus per far viure le lenga e la cultura occitanas a Tolosa

Lo collectiu d’associacions Convergéncia Occitana fa un bilanç fòrça positiu de lo rencontre qu’organizèt lo 15 de febrièr passat amb los candidats a la comuna de Tolosa o sos represantants per parlar de la politica municipala en favor de la lenga e de la cultura occitanas. La sala del Senescal èra claufida e los candidats faguèron bon acuèlh a las proposicions de las associacions. Segon Jean-François Laffont, president de Convergénecia Occitana, l’escasuda d’aqueste rencontre prova que «la cultura occitana es venguda un enjòc cultural, mas tanben social e economic : lo de l’identitat culturala retrobada e afortida d’una vila e d’una encontrada.» Trobaretz çai-jos lo comunicat de Convergéncia Occitana en francès e en occitan.

Téléchargement convergencia_occitana.pdf

Graneta, un libre illustrat pels mainatges de 5 a 8 ans

Senhalam la publicacion çò de Vistedit d'un novèl album pels mainatges, Graneta, escrich e illustrat per Terèsa Pambrun. S'adreça als drolles que començan de legir, duscas a 8 ans. L'editor lo presenta atal : «Es l’istòria d’una petita grana, Graneta, que se demanda quand poirà sortir de tèrra. Li calrà esperar lo solelh. Puèi Graneta tornarà dins la tèrra quand la davalada serà acabada e quand tornarà l’ivèrn.» Existísson doas variantas, una en lengadocian, l'autra en gascon. Se vend 7€ mai 1,57€ de pòrt. Se pòt crompar en lo comandar a Vistedit, bon de comanda a cargar e a imprimir sul siti.

La senhalizacion bilingüe, un enjòc capital : l'exemple illustrat de Tolosa

Abans las eleccions municipalas, las associacions occitanas balhan lor messatge a los candidats de tots los partits. Demest lors demandas, l'installacion d'una senhalizacion publica bilingüe dins las ciutats de l'airal occitan (placas de carrièras, placas direccionalas, dintrada et sortida de vila...). Pòt far sorire d'unes, mas l'enjòc es capital.

La Setmana n° 651 fa lo punt sus las eleccions municipalas dins las grandas vilas occitanas

Lo setmanièr del 21 de febrièr es paregut. Dins aqueste numerò 651 :

• Seissanta oras de garda a vista... per pas res, p. 2
• Renóncian a un projècte de quotidian en galés, p. 3
• Austràlia demanda perdon a sos aborigèns, pp. 4 e 5
• La batalha per las vilas grandas es aviada, pp. 6 e 7
• Venguèron totes manca un, p. 8
• « Premícias d’Euròpa », p. 10
• Clinhet istoric au cafè gascon landés, p. 11
• Per salvar una espècia d’ors menaçada, p. 12

Prètz : 1,5€ per numeró, 75,50€ l'abonament annal. L'editor n'es Vistedit.

Teatre : Aristofanada, femnas al poder, la novèla creacion de La Rampe/TIO

La compania teatrala occitana La Rampe/TIO prepara un novèl espectacle per la debuta d'abrial. Aristofanada, femnas al poder, una peça de Marceau Esquieu mesa en scèna per Claude Alranq, serà jogada al teatre La Vista de Montpèlhier los 3, 4, 5, 6, 1O, 11 e 12 d'abrial (barri Figuerolle, 42 carriera Adam de Craponne) e lo 8 d'abrial al fugal municipal de Mesa (Mèze, Erau). Marceau Esquieu s'inspirèt del dramaturg grèc Aristofana per escriure un tèxt que se trufa del "biais mascle" de bailejar la ciutat amb umor e fantasià. L'espectacle serà jogat en occitan, amb de subretitols en francès.

L'occitan sul oèb : qualques sitis indispensables

Uèi, volèm senhalar tres esplechs fòrça utils, per escriure d'imèls per exemple, qu'avèm descobèrts sul oèb graciàs al forum Occitània ! que ja avèm parlat aicí e que festèja uèi son primièr aniversari. S'agís de dos diccionaris en linha. Lo primièr es un traductor occitan-francès francès-occitan qu'es plan de bon utilizar, que prepausa tanben una ajuda per conjugar los verbs. L'autre siti es una vertadièra meravilha : lo diccionari general occitan de Cantalausa, que podètz consultar en linha. Plan segur, los dos son gratuits. Enfin senhalam un autre otís que cal metre sulcòp amb vòstres sitis favorits, un «traductor de clavièr» que permet escriure amb los accents. Òsca a tots !

Eleccions municipalas : los candidats e lo programa del Partit Occitan

Los autonomistas occitans participon a las eleccions municipalas dels 9 e 16 de març que ven. Lo Partit Occitan nos a mandat la lista de la comunas ont presenta de candidats (que coneisson a l'ora d'ara), dins tota l'Occitània, que publicam çai-jos. Tanben trobaretz çai-jos las proposicions municipalas d'aqueste partit.

Téléchargement programa_municipal.pdf

Dins La Setmana d'aquesta setmana

Lo setmanièr del 14 de febrièr es paregut. Dins aqueste numerò 650 :

• Jacques Morio, journalista, arrestat a l’auba, p. 2
• Los Las Vegas pirenenc, p. 3
• Lo departament de Pirenèus-Orientals oficializa sa catalanitat, pp. 4 e 5
• Los elegits son interpelats pels occitanistas, p. 6
• Lo Collègi tòca lo còr de las municipalas, p. 7
• Lo ròck negre, pp. 8 e 9
• Drets televisuals per la Liga 1, p. 10
• Libres, revistas, p. 11
• Rugbi, Carnaval, p. 12

Lo jornal se vend 1,5€. L'abonament per un an costa 75,50€. L'editor n'es Vistedit.