Resson d'Oc

Municipalas a Pau : los calandrons bastiguèron un collègi simbolic amb de cartons

Lo dissabte passat, 9 de febrièr, 150 a 200 personas simpatisantas de las diferentas associacions occitanas de Bearn manifestèron a Pau per demandar un local qu'abrige la tresena calandreta de l'aglomeracion e lo collègi calandreta a la dintrada de setembre 2008. Simbolicament, los calandrons e collegians bastiguèron lor collègi amb de cartons en presencia de los candidats a la comuna de Pau, François Bayrou, Martine Lignières-Cassou e Yves Urrieta, l'actual conse. Tots s'engatjèron a discutir per ajudar lo collègi a trobar un bastiment entà la dintrada. La municipalitat de Pau e lo conselh general son tanben pres a ajudar sia a crompar los locaus, sia a ajudar financiarament una aquisicion. Cai-jos l'apèl a manifestar.

Municipalas a Tolosa : los electors e los candidats convidats a debatre sus lo tèma occitan lo 15 de febrièr

Amb las eleccions municipalas del 9 de març, los amoròs de la lenga e de la cultura occitanas tenon una oportunitat unica de far ausir lor votz. Lo collectiu Convergéncia Occitana, que recampa las associacions tolosencas de l’Ostal d’Occitània, convida los candidats al Capitòli a un debat dobert a tot lo monde sus aqueste tèma lo divendres 15 de febrièr a la Sala del Senescal de 18h a 19h30.

Téléchargement Propositions_pour_culture_occitane_Toulouse.pdf

De legir dins La Setmana n° 649

Lo numerò del 7 al 13 de febrièr del setmanièr occitan pareis doman. Vaquí lo somari :

• La politica lingüistica d’Aquitània votada e atacada per l’extrema dreta, p. 2
• La senhaletica en occitan explicada, p. 3
• Lo govèrn confirma als senators lo debat sus las lengas, pp. 4 e 5
• Encara qualques dictadas, p. 6
• Lo CAOC festegèt sos 30 ans, p. 7
• Marselha, carrièra de la Republica, pp. 8 e 9
• Ancians e gafets se faguèron plaser, p. 12

Lo jornal se vend 1,5€. L'abonament per un an costa 75,50€. L'editor n'es Vistedit.

Un ostal comun per las associacions occitanas de Montpelhièr

L’Espaci Jacme 1èr d’Aragon foguèt inaugurat lo dissabte 2 de febrièr a Montpelhièr per lo president del conselh regional Lengadòc e Rosselhon, Georges Frêche. Abrita las activitats d’associacions culturala ibericas, e subretot ven lo sèti d’associacions occitanas recampadas dins l’Ostal d’Occitània : Confederacion Occitana de las Escòlas Calandretas, Federacion de las Calandretas d’Erau, associacion La Poesia, Talhièr Parlar, annèx del Centre de Formacion Professionala Occitan e Cercle Occitan de Montpelhièr (informacion de lo Centre de Formacion Professionala Occitan).

Espaci Jacme 1èr d’Aragon
Ostal d’Occitània
117 carrièra dels Estats Generals – Barri de Richter
34000 Montpelhièr
Tramway linhas 1 et 2, arrest «Rives du Lez».
Accès per la Planca dels Barons de Caravetes

Las lengas de França en debat al salon Expolangues

Lo salon annal Expolangues se tenirà a Paris pòrta de Versailles del 6 al 9 de febrièr. Destinada a promòure l'ensenhament de las lengas, defendre lo plurilingüisme e encoratjar los escambis internacionals, la manifestacion s'adreça als professionals et al grand public. Amb aqueste salon, la Delegacion generala a la lenga francesa e a las lengas de França del ministèri de la Cultura organizarà una taula redonda lo divendres 8 de febrièr sus aqueste tèma : «Las lengas de França, situation e enjòcs». Vaquí la présentation que ne fa lo siti d'Expolangues.

Eleccions municipalas : Anem Oc escriu a los candidats

Lo comitat Anem Oc, qu'organizèt las manifestacions de defensa de la lenga occitana de Carcassona e subretot de Besièrs, l'an passat, a escrich una pichona brocadura destinada a los candidats a la eleccions municipalas del 9 de març per que sàpian cò que podon far dins los comuna en favor de la lenga occitana e del bilingüisme. Cadun pòt far connéisser aqueste tèxte als candidats de sa comuna. Sufis de telecargar lo document çai-jos.

Téléchargement anem-oc_municipalas.pdf