Resson d'Oc

Un libre constata la vitalitat de las publicacions periodicas en occitan

Senhalem la publicacion recenta d’un libre en francés, Actes de résistance sociolinguistique - Les défis d’une production périodique militante en langue d’oc. L’autor, Carmen Alén Garabato, es cercaire a l’universitat Paul-Valéry de Montpelhièr. Aqueste obratge estudia diversas publicacions periodicas en occitan, sos redactors e sos legeires e constata una vitalitat tant vertadièra coma inesperada. Analisa aquestas iniciativas coma d’actes de resisténcia a l’uniformisacion culturala e coma de pròvas de leialtat lingüistica que se renovelan a cada generacion.

• Actes de résistance sociolinguistique - Les défis d’une production périodique militante en langue d’oc, Carmen Alén Garabato, Paris, L’Harmattan, 2008, 214 paginas, 20€.

Article en français, cliquez ci-dessous

Un collòqui sus «L'occitan, lenga del trabalh e de la vida vidanta» los 23 e 24 de mai a Lemòtges

Lo Centre Trobar e l’Institut d’estudis occitans de Lemosin organisan un collòqui sus «L’occitan, lenga del trabalh e de la vida vidanta (sègles XII-XXI)». Se debanarà a Lemòtges los 23 e 24 de mai, a l’ostal de la region Lemosin. Segon los organisators, «un quinzenat d’especialistes e d’universitaris de renomenada internacionala se rescontraràn altorn de la lenga occitana». Las personas interessadas se devon inscriure, l’inscripcion es gratis. Traparetz lo programa çai-jós.

Téléchargement colloque_trobar_2008.pdf

• Mai informacion : Centre Trobar, Pôle culturel troubadour limousin, 20, rue Michelet, 19200 Ussel. Tel. e fax : 05.55.72.80.83 ; [email protected]

Article en français, cliquez ci-dessous.

La Val d’Aran encoratja sos estajants a s’encontrar entà parlar en occitan

Lo departament de Cultura e Politica Lingüistica del Conselh General d’Aran a lançat lo Volontariat per Aranés, un programa per que las personas que conéisson basicament la lenga aranesa la pòscan parlar amb d’autras que la parlan acostumadament. Lo Volontariat per Aranés ajudarà las personas motivadas a s’encontrar. Las parelhas conversaran un minimòm de detz oras (ont, quora et de çò que vòlon). Aquesta politica s’inspira del Voluntariat per la llengua ja mes en plaça en Catalonia. Los apreneires e los tutors se dévon inscriure alprèp del Conselh General d’Aran. L'aranés, qu'es lenga oficiala dins la val d'Aran, es una varianta del gascon.

Article en français, cliquez ci-dessous.

Los darrièrs desvolopaments de la politica lingüitica dins la Setmana n° 660

Tanben dins lo setmanièr del 24 d'abrial, la descobèrta de vestigis antics a Nimes. Vaquí lo somari :

• Aimé Césaire, p. 2
• Biocarburants, p. 3
• Un debat sus las lengas a l’Assemblada Nacionala, p. 4
• Per un estatut de las lengas de França, p. 5
• Tresaurs de Nimes, pp. 6 e 7
• L’acadèmia de Clarmont bofa lo caud e lo freg, p. 8
• L’ensenhament en basc mancarà de pòstes, p. 9
• Lo pavilhon de las Lanas de Gasconha hè entrar la lenga, p. 10
• L’UMP colhonada, Rugbi, p. 12

Prètz : 1,5€ per numeró, 75,50€ l'abonament annal. L'editor n'es Vistedit.

Sommaire en français ci-dessous

Los programas occitans de France 3 de seguir sul siti Internet de la cadena

Las cadenas regionalas de France 3 de l’airal occitan, France 3 Aquitaine, France 3 Sud e France 3 Méditerranée, difusan de programas informatius en lenga nòstra. Aquò, ja o sabiatz. Çò que se sap pas totjorn, es que se pòt seguir aquestas emissions sus lo siti Internet de France 3. Aquò’s plan util se n’avètz mancat una o se demoratz pas dins l’airal de difusion. 

• France 3 Aquitaine. Le magazine occitan, lo dimenje a 12h10, presentat per Denis Salles. Sostitulat en francés.
• France 3 Sud. Viure al pais,  lo dimenje a 11h30, presentat per Benoît Roux e Clément Alet ; le journal occitan, lo dissabte en debutar lo 19/20.
• France 3 Méditerranée. Vaqui, lo dissabte a 10h30.

Article en français, cliquez ci-dessous.

Le Comité, un novèl grop e son primièr disc

Quora dos grops musicals, Joglar’verne e La Fabrique, se mesclan, aquò balha Le Comité, un novèl conjunt de sèt cantaires e musicians, que joguèt en concert pel primièr còp lo 5 de març passat a Lempdes, en Auvèrnha. Ara, es l’ora del primièr disc, «Comment faire», que serà en venta tre lo mes de mai, distribuit per l’Autre Distribution, mas que ja se pòt crompar amb lo butletin de soscripcion que traparètz çai-jós. Se dison enfluençats tant per The Police e Bob Marley coma pel cant popular occitan, per crear una musica mestissada, de cansons «de partatge e de fèsta». Vaquì la presentacion que ne fa letransfo.fr, trapada sus Youtube.

Article en français, cliquez ci-dessous.

Infòc, l'informatiu occitan aranes : l'edicion del 19 d'abrial

Cada dissabte, l'Associacion aranesa entara difusion d'Occitània en Catalonha (Adòc) difusa Infòc en directe sus Barcelona TV. Es un programa informatiu en occitan, una setmana en lengadocian, l'autra en aranes. Serià pecat que solament los telespectators catalans pòsquen n'aprofechar ! Trobaretz aici l'edicion de dissabte 19 d'abrial, en aranes. Lo programa es sostitulat en catalan.

Présentation en français, cliquez ci-dessous

Dos libres per comprene los rapòrts entre l'escòla e l'occitan

Las Premsas universitarias de la Miegterrana de l’universitat Paul Valéry de Montpelhièr an publicat recentament dos libres en francés qu’analisan los rapòrts entre l’escòla republicana e las lengas regionalas, e mai precisament, l’occitan als sègles XIX e XX.

• «L’école française et l’occitan. Le sourd et le bègue», de Philippe Martel, recampa d’articles sus l’actituda contradictoria de l’escola e de los regents cara a l’occitan, entre reprimida e compreneson (192 paginas, 15€).
• «L’école française et les langues régionales (XIXe-XXe siècles)», de Hervé Lieutard e Marie-Jeanne Verny, espandís la soscadissa a divèrsas regions francesas. Lo libre s’acompanha d’un DVD gratis, « Quel est ce charabia », una videò de testimoniatges rodada en Avairon (360 paginas, 20€).

Se voletz crompar aquestes obratges : [email protected] ; 04.99.63.69.25.

Article en français, cliquez ci-dessous.

La Setmana n° 659 mena sos legidors sus l'iscla de la Reünion

Tanben dins lo setmanièr del 17 d'abrial, lo porgiment de congrès de las Calandretas. Vaquí lo somari :

• Zapatero investit defensor de «las lengas d’Espanha», p. 2
• Irlanda del nòrd es estacada a la patz, p. 3
• «Paris capitala» es tornarmai sus la taula, p. 4
• L’Estat garda la direccion dels afars, p. 5
• La Reünion pren consciéncia de sa lenga, p. 6
• Avançar amb prudéncia, pp. 7 e 8
• Carta blanca sus RFO, p. 8
• Far viure la lenga occitana, p. 10
• Lo Congrès de las Calandretas en Bearn, p. 12

Prètz : 1,5€ per numeró, 75,50€ l'abonament annal. L'editor n'es Vistedit.

Sommaire en français ci-dessous

La fèsta de las Calandretas se debanarà del 7 al 10 de mai en Bearn

Lo congrès de la Confederacion de las escòlas occitanas Calandretas, que recampa 46 escòlas primàrias e 2 collègis dins tot l'airal ocitan, se debanarà de 7 al 10 de mai dins la valada d'Ossau, a Vièla e Laruntz. Pendant quatre jorns, serà l'escasença d'encontres, d'escambis e de concèrts. Vaquì lo programa dels espectacles :

• Dijòus 8 de mai, 19h30 al gimnasi de Laruntz : "Viatge en lenga", espectacle de las Escòlas Calandretas e bilingüas amb Joan-Francés Tisnèr e Roman Baudoin ; "Rugbi", creacion musicala e artistica de Joan-Francés Tisnèr e Lionel Dubertrand ; "Pakopolen", grop occitan de Gasconha (5 euros).
• Divendres 9 de mai, 21h al gimnasi de Laruntz : "La mal coiffée", grop occitan de Lengadoc ; "Monesi", grop occitan de Bearn ; "Amaren Alabak", grop basc ; bal amb Mossur Artús, grop occitan de Gaconha (5 euros).

Mai informacions : [email protected] ; tel. : 05.59.68.68.73.

Article en français, cliquez ci-dessous