Resson d'Oc

L'Académie e lo Senat s'enganan : son pas las lengas regionalas qu'amenaçan lo francés

Los vòtes contradictòris al Parlament a prepaus de las lengas regionalas son l'escasença de dobrir una rubrica «Debats» sus Resson d'Oc. Espèri una participacion abondanta, per mostrar que l'occitan es mai es mai qu'un patrimòni e per de bon una lenga e una cultura vivas qu'an encara de causas de dire al mond.

Alavetz. Doas institucions de las joves e modernas, l'Academie française e lo Senat, refutan l'inscripcion de las lengas regionalas dins la Constitucion coma «patrimòni de la nacion», qu'amenaçarià lo francés e l'unitat del païs. Ieu refuti l'arguiment : i a pas res qu'amenaça l'unitat francesa, aicì s'agìs pas de separatisme mas de reconéiser la diversitat culturala que balha sa riquesa al conjunt. Lo francés es amenaçat, aquò's vertat, mas lo perilh ven del marrit englés impausat per l'uniformisacion e la pretension de los comunicaires parisencs de parlar «hype». Cal que sià solidari de sos vesins, que son d'aligats, pas d'enemics.

Aquò dich, es que la Constitucion deu reconéisser las lengas regionalas ? Benleu pas. Que cambiarià ? Aquò las salvarà pas. Quora ausissi patrimòni, pensi passat, musèu, folclòr. Aquò's pas çò que vòli per l'occitan. Parlem, escrigam, legiscam, cantem, escambien, ensenhem, e la lenga serà salvada. Mostrem als trufandièrs que s'enganan. Cal pas esperar que l'Estat nos ajude, sèm en França : pòt pas salvar çò qu'a volgut tuar, lo mite del perilh regional es encara viu demest los jacobins. Nosautres, sèm pas mai jacobins qu'eles, en esperar que lo salvament vendrà de l'Estat. Vesi de senhals mai que positius al nivèl regional e local, es aqui que nos devem concentrar.

Article en français, cliquez ci-dessous.

Lo Festenal dels suds d'Arles consacra una jornada a la musica occitana lo 18 de julhet

Lo Festenal dels suds, en Arles, aculhís d’artistes del monde entièr dempuèi 1996. Ongan se debanarà del 13 al 20 de julhet e una jornada, lo 18 de julhet, serà consacrada a la musica e a la cultura occitanas. Lo public podrà ausir Lo Còr de la plana al Teatre antic (21 oras 30), Du Bartas a l’Ort d’estiu (11 oras 30) e plaça Paul Doumer (18 oras) e Les Cantaires de la Palun Longue. Alem Surre-Garcia balharà una conferéncia musicala sus «Los Orients d’Occitània» amb Martina de Peira. Los autres jorns, podretz escotar Le Chœur de La Roquette (lo 15 a 11 oras 30 plaça Paul Doumer e a 18 oras a l’Ort d’estiu), Familha Artus (lo 16 a 21 oras 30, Talhièrs SNCF), Sam Karpienia (17 de julhet, 21 oras 30, Teatre antic, primièra part de Goran Bregovic) e lo parelh Marquet-Bachevalier (20 de julhet, estanh dels vèrns, 18 oras). Cal pas doblidar, per acabar, un estagi de danças occitanas amb Marie Picard (del 15 al 18 de julhet, de 16 oras 30 a 18 oras 30).

• Entresenhas : [email protected]/04.90.96.06.27
  

Téléchargement Programme.pdf

Présentation en français, cliquez ci-dessous.

Cinc jornadas de soscadissa sul passat e l'avenidor d'Occitània a l'Universitat d'estiu de Nimes, del 5 al 9 de julhet

Del 5 al 9 de julhet ; la 32ena Universitat occitana d’estiu de Nimes sul tèma «Occitània, passat e avenidor» serà l’escasença de soscar sus l’istòria occitana, evocar la riquesa de la literatura d’òc, passada e presenta, e parlar de l’avenidor de nòstra cultura. Cinc jornadas tèmaticas son previstas, amb de conferéncias e de taulas redondas :

• Dissabte 5 : istòria
• Dimenge 6 : Max Rouquette
• Diluns 7 : passat
• Dimarç 8 : rapòrts amb Catalonha
• Dimecres 9 : avenidor

Tanben i aurà de talhers de cant, de lenga e d’informatica. Cada jornada se clausarà amb una serada de teatre o de musica (gratis). L’Universitat d’estiu es organizada per la Marpoc e l’IEO 30. Entresenhas : [email protected]/04.66.76.19.09.

Téléchargement Programa_UOE_2008.pdf

Article en français, cliquez ci-dessous.

Voses occitanas, bascas e bretonas per festejar la Sant Joan en Carladés lo 27 de junh

Lo Carladés es un pichon país occitan a las bòlas de Cantal e d’Avairon, que son nom li balhèt lo vilatge de Carlat (15). Cada an dempuèi 2005, aqueste país festeja la Sant Joan d’un biais espectacular altorn del cant : passejadas cantadas, repais, concèrts, jòcs tradicionals, balètis, fuòcs… Ongan la manifestacion se debanarà lo divendres 27 de junh en Polminhac. Participaràn a la fèsta la cantaire basca Maddi Oihenart, los Bretons Pierre Guillard e Sylvain Girault e Voses de femnas, un grop de 15 antairitz amatritz qu’an trabalhat lo repertòri occitan e las cançons de trobadors amb Olivier Chabaud. La fèsta s’acabarà en danças altorn dels randals amb Traucaterme. Vaquí lo programa :

• 19 oras, arribada de la flamba ambe los cants dels escolans e des ancians de Polminhac
• 19 oras 30, repais cantat sus la plaça
• 21 oras 30, concèrts pels recantons del vilatge
• 23 oras, procession pagana de la Sant Joan
• 23 oras 30, embrasament pirotecnic del lac
• 23 oras 45, bal

Entresenhas : 04.71.47.50.68/ [email protected]

Présentation en français, cliquez ci-dessous.

Lo revolum viticòla explicat dins La Setmana n°667

Tanben dins lo setmanièr del 12 de junh , la mòstra de Saragossa. Vaquí lo somari :

• Lo tèxte de modificacion constitucionala passa al Senat, p. 2
• Saragossa serà capitala de las aigas, p. 3
• La Mediterranèa se dobrís al mond tot, p. 4
• Total Festum, p. 5
• La viticultura poiriá èstre mai industriala, pp. 6 e 7
• Es una revolucion indispensabla, p. 8
• Lo vin e lo regent, p. 9
• Anèron duscas en quarts de finala, p. 10
• A bicicleta, que hèn la virada de las calandretas, p. 12

Prètz : 1,55€ per numeró, 78,50€ l'abonament annal. L'editor n'es Vistedit.

Sommaire en français, cliquez ci-dessous.

Lo 17 de junh, la fèsta d'Aran s'espandís fins a Barcelona

Lo dimars 17 de junh que ven, se celebrarà la Hèsta d'Aran, la fèsta oficiala de la Val d'Aran, en commemoracion de la restauracion del Conselh general, lo 17 de junh 1990, del estatut d'autonomia dins la Generalitat de Catalonia e de l'oficialisacion del aranés. I a un programa d'activitats dins la Val d'Aran, plan segur, mas ongan la fèsta s'espandís fins a Barcelona, plaça del Rei, de 19 a 22 oras entà far conéisser la lenga e la cultura occitanas, amb de lecturas de tèxtes e un bal de danças tradicionalas animat pel grop Mirabèl (fotò).

Article en français, cliquez ci-dessous.

Lo programa complet de Total Festum 2008, la fèsta de las culturas occitana e catalana en Lengadoc-Rosselhon (14-24 de junh)

Total Festum, la fèsta granda de las culturas occitana e catalana en Lengadoc-Rosselhon, se debanarà dins tota aquesta region del 14 al 24 de junh. Concerts, balètis, fuòcs, jòcs, taulejadas seràn tant de biais de celebrar la Sant Joan. Dins aqueste encastre se podrà ausir a Montpelhièr una creacion musicala de Laurent Audemard et Jakes Aymonino, Rasims de Luna, altorn de l’obra poètica de Max Rouquette, creada a l’escasença del centenari de sa naissença (19 de junh a 21 oras a l'Opéra Comédie de Montpelhièr).

Programa de telecargar çai-jós (l'ai trapat sul siti de la Felco, Federacion per l'Ensenhament de la Lenga e de la Cultura d'Oc). 

Téléchargement Total_Festum_2008.pdf

Article en français, cliquez ci-dessous.

La Setmana n°666 evòca la practica de la lenga dins los ostals de retirada

Tanben dins lo setmanièr del 5 de junh, la mòrt del filològ Guiu Martin. Vaquí lo somari :

• Los autonomistas contra lo president, p. 2
• França a parat l’aurelha ?, p. 3
• E se l’article 1er èra pas modificat ? p. 4
• Los deputats son satisfaits de lor vòte, p. 5
• La lenga ensenhada als emplegats de maisons de retirada, p. 7
• Guiu Martin es mòrt, p. 8
• Çò que disètz, çò que pensatz, p. 9
• Lo cantaire espeluhat, p. 10
• Revistas, p. 11
• Lo Forom de las Lengas, p. 12

Prètz : 1,5€ per numeró, 75,50€ l'abonament annal. L'editor n'es Vistedit.

Sommaire en français, cliquez ci-dessous.

Dos libres novèls per saludar lo centenari de Max Rouquette

L’escrivan grand, mòrt en 2005, aurià fach cent ans ongan. Tota l’annada se celebra sa memòria e son òbra mercés al dinamisme de l’associacion Amistats Max Rouquette. Dos libres ven de paréisser (o tornar paréisser).

• D’aicí mil ans de lutz foguèt publicat en 1995. Es una acampada de 45 poesias en occitan amb una revirada per l’autor (edicions Jorn, 110 paginas, 15€).
• Poèmas de pròsa es la primièra edicion de tèxtes escrichs entre 2000 e la mòrt de Max Rouquette. Es tanben una edicion bilingua (edicions Fédérop, 144 paginas, 15€).

Article en français, cliquez ci-dessous.

Festa d’Oc, lo festenal occitan de Besièrs dobèrt sul monde (9-13 de julhet 2008)

Lo rendètz-vos annadièr de la cultura e de la musica occitanas se debanarà a Besièrs (Erau) del 9 al 13 de julhet. Los visitaires podran plan segur ausir de musica de dançar e de cantaires tradicionals, mas tanben de grops mai contemporanèus. Cal pas doblidar las charadissas, los tastatges de vins e un fum d'animacions. L’especificitat d’aqueste festenal es que se dobrìs cap a d’autras culturas. Ongan se podràn escotar Jimmy Cliff, Pink Martini e Luz Casal. Vaquì los grops occitans anonciats : Marilis Orionaa e Jean-Luc Mongaugé, Los cigalons, Landiridi, Fial de Lana, Nathanaëlle, Occitaniss, Laurent Cavalié, Le Comité, Zo !, L’Art à Tartouille, Mauresca Fracas Dub, Goulamas’k, Lou Dalfin, Bombes 2 Bal. Programa complet sul siti de la vila de Besièrs.

Article en français, cliquez ci-dessous.