Resson d'Oc

Un collòqui consacrat a la poesia contemporanea los 3 e 4 d'abrial a Montpelhièr

Dins l'encastre de la commemoracion del centenari de Max Rouquette (1908-2005), la còla RedOc-Etoill de l'universitat Paul-Valéry de Montpellhièr organiza un collòqui sus lo reviscòl del trobar occitan entre 1930 e 1960, altorn de la figura centrala del grand poèta. Titolat "Max Rouquette et le renouveau de la poésie occitane - La poésie d’oc dans  le concert des écritures européennes (1930-1960)", aqueste collòqui se debanarà los 3 e 4 d'abrial a la mediatèca Emile Zola de Montpelhièr e promet d'èstre passionnant. Traparètz lo programa detalhat sus lo siti de l'Associacion Amistats Max Rouquette.

Los amorós del libre occitan an rendètz-vos a Escritura 2008

Lo dimenge 6 d'abrial, lo famòs vilatge del libre d'Aude, Montolieu, aculhirà la setzena edicion d'Escritura, lo grand mercat de l'escrit occitan, catalan e regional. Los visitors podran trapar libres de los editors seguents : IEO (Ideco, IEO-11), Adeo, Creo-Provença, Letras d'Oc, Le Moustier, CDDP-Sceren e Vent Terral. Tanben i aurà un mercat del terrador e un fum d'animacions divèrsas : musica, jòcs, conferéncias, mòstras (una que ja n'avèm parlat a prepaus del centenari de Max Rouquette, autra d'Anna Réby qu'a complit lo dessenh qu'illustra aqueste articolet) e per acabar una tasta de vin. Trobaretz çai-jos lo programa detalhat (que pòt i aver de modificacions)

Max Rouquette (1908-2005), las mòstras del centenari

Max Rouquette, que foguèt un escrivan màger del segle XX, desaparegut en 2005, aurià fach cent ans ongan. Aqueste aniversari serà festejat durant tota l'annada mercès a l'associacion Amistats Max Rouquette qu'organiza una seria d'eveniments a l'entorn de l'òbra del poèta : conferencias, exposicions, edicions novelas, espectacles... Resson d'Oc presentarà las manifestacions a mesura del desbanament del centenari. Uèi parlarèm de las tres mòstras previstas.

La mediatèca de Rodés celebra la Prima occitana

Durant lo mes de març, la Prima occitana se debana a la mediatèca de la vila de Rodés. Aqueste festenal prepausa una conferença, de lecturas, una exposicion, d’espectacles e la projeccion d’un film. Vaqui lo program, qu’es estat elaborat amb lo sosten de l’Institut d’estudis occitans d’Avairon e lo Centre cultural occitan de Roèrgue e qu’avèm trobat sul siti de la comuna de Rodés.

Al Printemps des poètes 2008, los poètas se festejan tanben en occitan

A l'escasença del desen Printemps des poètes, que se debana duscas al 16 de març pertot en França, cal senhalar doas manifestacions en occitan organizadas a Montpelhier. Dijòus 6, lo poèta Jean-Luc Sauvaigo presentarà son recuelh Compendi derisori dau desidèri. Divendres 7 l'espectacle «Paroles pour le vent» rendrà un omenatge al grand poèta contemporanéu Max Rouquette. Aquò remembra un còp de mai que nòstra lenga, qu'es estada una lenga màger d'expression poëtica dempuei l'Edat Mejana, o demora al segle XXI.

Graneta, un libre illustrat pels mainatges de 5 a 8 ans

Senhalam la publicacion çò de Vistedit d'un novèl album pels mainatges, Graneta, escrich e illustrat per Terèsa Pambrun. S'adreça als drolles que començan de legir, duscas a 8 ans. L'editor lo presenta atal : «Es l’istòria d’una petita grana, Graneta, que se demanda quand poirà sortir de tèrra. Li calrà esperar lo solelh. Puèi Graneta tornarà dins la tèrra quand la davalada serà acabada e quand tornarà l’ivèrn.» Existísson doas variantas, una en lengadocian, l'autra en gascon. Se vend 7€ mai 1,57€ de pòrt. Se pòt crompar en lo comandar a Vistedit, bon de comanda a cargar e a imprimir sul siti.

Una dictada per festejar la lenga escrita dins tota l'Occitània

Deman dissabte 26 de genièr se debanara la dicatada occitana dins un trentenat de vilas occitanas e fins a Barcelona (Téléchargement Programa_Dictada_Occitana.pdf ). Aquel eveniment foguèt creat en 1998 per la seccion IEO de Castras. Una vertadièra festa de la lenga escrita que se tèn simultaneament lo quatren dissabte de genièr dins totes los païses occitans. Segon los organisators, l'esperit de la dictada, doberta a tots e gratis, es pas la competicion mas partejar un moment de rescontre e de convivialitat altorn de la lenga, dins lo respècte de los diferents dialectes occitans. La dictada consistis en la lectura de texts d'escrivans occitans. Aquo's un biais fòrça interessant de far conéisser los autors d'ara e de prener consciéncia de la realitat occitana d'uei.

Los escrivans en lengas minoritarias de França s'encontran en Païs basc

L’Association des écrivains basques/Euskal Idazleen Elkartea organisait le week-end dernier à Bardos (Pays basque) une rencontre entre auteurs de langues minoritaires de France — Basques, Occitans, Alsaciens, Bretons, Corses et Catalans. Le but était de "resserrer les liens entre les communautés littéraires" et de partager leurs expériences pour relever les défis auxquels ces littératures sont confrontées au XXIe siècle.