Resson d'Oc

Infòc, l'informatiu occitan aranés : l'edicion del 28 de junh

Cada dissabte, l'Associacion aranesa entara difusion d'Occitània en Catalonha (Adòc) difusa Infòc en directe sus Barcelona TV. Es un programa informatiu en occitan, una setmana en lengadocian, l'autra en aranes. Serià pecat que solament los telespectators catalans pòsquen n'aprofechar ! Trobaretz aici l'edicion de dissabte 28 de junh, en aranés. Lo programa es sostitulat en catalan.

Présentation en français, cliquez ci-dessous

Quaserns Max Rouquette, una revista per lo centenari

Max Rouquette (1908-2005) acaba pas de far parlar d’el ongan, que se fèsteja son centenari. L’associacion Amistats Max Rouquette, qu’organiza l’aniversari, publica una revista annadièra, los Quaserns Max Rouquette, que lo numerò 2 ven de paréisser. 65 paginas en francés e en occitan per ne saber mai a prepaus del poèta e de son òbra, de l’òme, del mètge, l'esportiu. Reteni especialament los testimoniatges fòrça esmovents de Jean-Marie Petit e Yves Rouquette, lo relat de los ligams de l’escrivan amb l’autre gigant Bernard Manciet, e l’article Max Rouquette e los arbres. Tanben plan interessanta la soscadissa de Robert Lafont sus la revirada de Verd Paradis en francés. La revista tota es ilustrada de fotòs negre e blanc magnificas. Per acabar, citi quatre vèrs que me quitan pas dempuèi que los ai legits :

«En las carrieiras d'aur de Montpelhièr,
Ont lo tantòst vojava sa patz blonda,
avem seguit d'un sòmi sens parièr
lo fiu dau temps de la nòstra jovença.»

Téléchargement sommaire.pdf   

Téléchargement bon_de_commande.pdf

Présentation en français, cliquez ci-dessous.

La tempèsta lingüistica dins La Setmana n°669

Tanben dins lo setmanièr del 26 de junh, las celabracions esportivas de Total Festum a Sèta. Vaquí lo somari :

• Lo grand jòc mediatic, p. 2
• Lo Senat refusa las lengas dins la constitucion, p. 3
• Lo Senat es lo temple del conservatisme, p. 4
• Reaccions al vòte del Senat, p. 5
• De qué far pendent l’estiu ?, pp. 6 e 7
• Quand desparla l’Acadèmia, p. 8
• Victòria sens estrambòrd per Gordon Brown, p. 9
• Felibrejada e Hèsta de la dança, p. 10
• Los setòris faguèron onor als espòrts tradicionals, p. 12

Prètz : 1,55€ per numeró, 78,50€ l'abonament annal. L'editor n'es Vistedit.

Sommaire en français, cliquez ci-dessous.

Festen'Òc, en Arièja Nauta, lo 28 de junh e del 11 al 13 de julhet

Lo vilatge de Saurat, dins Arièja Nauta, prèp de Tarascon, organiza dempuèi 2002 un festenal dedicat a la cultura occitana. Festen’Òc es partejat en dos temps : la primièra part serà dissabte que ven, lo 28 de junh, qu’es lo moment mai tradicional del festenal, amb son fuòc de la Sant Joan, de danças e un bal. L’autra part se debanarà del 11 al 13 de julhet. I aurà de concèrts, segur, amb La Mal Coiffée, Eric Fraj, Brick à Drac, L’Art à Tatouille, Lo Dalfin, un espectacle de l’umorista Padena… Senhalem tanben un salon del libre e del disc lo dimenge, una messa en occitan e un mercat.

• Entresenhas : [email protected]/05.61.05.67.19.

Téléchargement programme_festenoc.pdf

Article en français, cliquez ci-dessous.

Quatren Hestiv'Òc, a Pau, del 20 al 24 d'agost

Hestiv’Oc, lo festenal de las culturas e musicas del sud, se debanarà a Pau del 20 al 24 d’agost. Pendant quatre jorns, l’espectacle e la fèsta seràn pertot jol bèl cèl de Pau, sus cinc scènas e dins las carrièras de la vila. Concèrts, talhèrs de dança, cantèra de dobertura… 500 artistes e 40 animacions son programats. E tot aquò serà gratis.

Téléchargement Programme_hestivoc2008.pdf

Présentation en français, cliquez ci-dessous.

Debat sus las lengas : mancava pas que l'arguiment del fascisme…

En França, se voletz despresar qualqu’un, sufís de l’acusar d’estre fasciste. I avià lo perilh per l'identitat francesa, la suspicion de separatisme, ara vaquì l'antisemitisme. Legissi dins Le Figaro d’aqueste matin una tribuna de l’escrivan François Taillandier a prepaus del debat sus las lengas dins la Constitucion (Langues régionales : les arrière-plans d'une cause «sympa»). E trobi la frasa seguenta : «Nos 68% de compatriotes (favorius a la reconeisença de las lengas regionalas segon un sondatge) ne se demandent pas pourquoi ils jugent si progressiste et novatrice cette reviviscence des pittoresques disparités de l’Ancien Régime, qu’ils honnissent tant par ailleurs, voire des rêves pastoraux du Maréchal.» Mai luenh : «Il faut savoir que les idéologues de cette tendance (los etnicistes) font leurs comptes et n’hesitent pas à mettre les juifs à part.» Aquel arguiment, o aviam pas ausit encara ! Los que defendon las lengas son pas etnicistes ! Aquò’s un amalgam curiós entre los defensors de la diversitat culturala, d’opinions politicas plan divèrsas, tant d’esquèrra coma de dreta, e una ideològia pudesenca, que pòrta pas brica a un debat apassionnant.

Note en français, cliquez ci-dessous.

Aprèp sèt ans, lo Brenus tornarà prene lo camin d'Occitània lo dissabte 28 de junh

Aprèp las semifinalas de la dimenjada passada, ja una causa es segura : lo campion de França de rugbí 2008 serà occitan. Dissabte, Clarmont venciguèt Perpinhan (21-7) a Marselha, e dimenge, Tolosa batèt Paris (31-13) a Bordeus. Veirem ben qual o emportarà. Fasía sèt ans que lo Brenus escapava als Occitans e que trantalhava entre Biarritz e Paris. Lo darrièr còp qu’un club occitan o brandiguèt, en 2001, èra lo meteis Tolosa, qu’avià batut lo meteis Clarmont.

Ara, somiem un pauc : podrià ressonar dins l’estadi de França un Se canta cantat per lo public tot, que saludarià las doas còlas a la debuta del rescontre. Una peticion per far d’aquesta cancion d’amor l’imne de l’Estadi tolzan a reculhit mai de 250 signaturas. Perque se confinar a Tolosa ? Podriam espandir aquesta idèa a totas las vilas de l’airal occitan, lo Se canta venirià un imne comun de totas la còlas occitanas. Nos cambiarià de quauques cants debils de suportaires.

Article en français, cliquez ci-dessous.

L'Estivada torna a Rodés del 21 al 26 de julhet

La veirina magèr de la cultura occitana, l’Estivada, torna a Rodés, en Avairon, del 21 al 26 de julhet. Dempuèi 1995, aqueste festenal recampa de creators e d’artistes dins totas las disciplinas de la cultura, davant un public cada an mai grand. Concèrts, dança, poesia, cinema, conferéncias n’i aurà per totes ! Los visitaires podran tanben visitar lo vilatge occitan qu’aculhirà los actors culturals (editors, mediàs, associacions, animacions). Totes los espectacles son gratis. Un rendètz-vous de mancar pas. Vaqui lo programa.

Téléchargement Programme_estivada_2008.pdf

La Setmana n°668 se preocupa de la crisi alimentària mondiala

Tanben dins lo setmanièr del 19 de junh, los debats altorn de la reconeissença de las lengas regionalas. Vaquí lo somari :

• Chirac o auriá pogut dire abans !, p. 2
• Vòlon far de las 75 lengas de França un espaurugalh, p. 3
• Lo Senat vòl esmendar l’esmendament, p. 4
• En 1950 Deixonne negocièt amb los senators, pp. 4 e 5
• Cal cambiar nòstra agricultura e nòstre biais de consumir, pp. 6, 7 e 8
• Enquestaires occitanofònes, p. 9
• Ensenhar l’occitan es un afar de mejans, p. 10
• Total Festum, p. 12

Prètz : 1,55€ per numeró, 78,50€ l'abonament annal. L'editor n'es Vistedit.

Sommaire en français, cliquez ci-dessous.

L'Académie e lo Senat s'enganan : son pas las lengas regionalas qu'amenaçan lo francés

Los vòtes contradictòris al Parlament a prepaus de las lengas regionalas son l'escasença de dobrir una rubrica «Debats» sus Resson d'Oc. Espèri una participacion abondanta, per mostrar que l'occitan es mai es mai qu'un patrimòni e per de bon una lenga e una cultura vivas qu'an encara de causas de dire al mond.

Alavetz. Doas institucions de las joves e modernas, l'Academie française e lo Senat, refutan l'inscripcion de las lengas regionalas dins la Constitucion coma «patrimòni de la nacion», qu'amenaçarià lo francés e l'unitat del païs. Ieu refuti l'arguiment : i a pas res qu'amenaça l'unitat francesa, aicì s'agìs pas de separatisme mas de reconéiser la diversitat culturala que balha sa riquesa al conjunt. Lo francés es amenaçat, aquò's vertat, mas lo perilh ven del marrit englés impausat per l'uniformisacion e la pretension de los comunicaires parisencs de parlar «hype». Cal que sià solidari de sos vesins, que son d'aligats, pas d'enemics.

Aquò dich, es que la Constitucion deu reconéisser las lengas regionalas ? Benleu pas. Que cambiarià ? Aquò las salvarà pas. Quora ausissi patrimòni, pensi passat, musèu, folclòr. Aquò's pas çò que vòli per l'occitan. Parlem, escrigam, legiscam, cantem, escambien, ensenhem, e la lenga serà salvada. Mostrem als trufandièrs que s'enganan. Cal pas esperar que l'Estat nos ajude, sèm en França : pòt pas salvar çò qu'a volgut tuar, lo mite del perilh regional es encara viu demest los jacobins. Nosautres, sèm pas mai jacobins qu'eles, en esperar que lo salvament vendrà de l'Estat. Vesi de senhals mai que positius al nivèl regional e local, es aqui que nos devem concentrar.

Article en français, cliquez ci-dessous.