Resson d'Oc

Encara un concors d'escritura en gascon

Dins l’encastre de sa politica lingüistica de desvolopament del gascon, lo Conselh general de Pirenèus Nauts (65) organisa lo 18en concors bigordan d’expression gascona, que son tèma es «A noste en Euròpa».

Aquesta iniciativa vòl encoratjar l’escritura en occitan a travèrs la creacion d’òbras ineditas o la transcripcion de contes, legendas o anècdotas transmetuts de costuma oralament. Lo concors es dobèrt a totes sens cap restriccion. La remesa de los prètz se debanarà al mes de junh. Los tèxtes en gascon son de mandar abans lo 2 d’abrial de 2010 a l’adreça seguenta : Detz-e-Ueitau Concors Bigordan d’Expression Gascona, 6 rue Gaston-Manent B.P.1324, 65 013 Tarbes Cedex 9

• Entre-senhas e reglament alprèp de Bernard Dubarry : [email protected].

Las Ivernalas de Cabardés aquesta fin de setmana a Puègnautièr e Argon (Aude)

 La setmana que se dobrís doman serà marcada per las Ivernalas de Cabardés, a Puègnautièr (Pennautier) e Argon (Aragon), dins lo departament d'Aude. Aqueste festenal organisat per l'Institut d'estudis occitans d'Aude se debanarà del dimecres 27 de genièr al dissabte 30. Al programa, d'espectacles, una conferéncia e plan segur, l'eveniment magèr de la setmana que ven, la fèsta granda de la lenga, la dictada.

Entre-senhas : IEO d'Aude (04.68.25.19.78 ; [email protected]).

Un còp de mai, la Dictada amassarà tota l'Occitània altorn de sa lenga lo 30 de genièr

 

Dempuèi mai de dètz ans (1998 per èsser mai just, la primièra session se debanèt a Castras), los amoroses de la lenga occitana dins totas sas variantas, que pàrlen plan o que pàrlen pas, jòves o vielhs, se retroban un còp l’an, al mès de genièr, per far una dictada. Amb lo temps, lo rendètz-vos s’es espandit dins totes los cantons d’Occitània fins a venir la fèsta granda de la lenga. L'edicion 2010 de la Dictada se debanarà lo dissabte 30 de genièr. I aura de sessions pertot, de Niça fins a Milhau e de Foish fins a Montalban e quite a Barcelona.

Primièr prèmi de literatura pels jovents de l'IEO, tèxtes de mandar abans lo 28 de febrièr

L'Institut d'estudis occitans (IEO), «qu'a constatat la manca de novèlas o romans en occitan entà gojatas e gojats», organisa son primièr prèmi de literatura joinesa. Es dobèrt a totes, los autors devon escriure una òbra originala e inedita en occitan a destinacion de los joves de 10 a 16 ans, roman o novèla, redigida en grafia classica (ai pas vist de precision dialèctala dins lo reglament). Los tèxtes premiats seràn editats per l'IEO e lors autors recebran de 500 a 1500 euròs. La remesa de los prèmis se debanarà al mes de mai a l'escasença de l'amassada generala de l'IEO.

• Tèxtes de mandar abans lo 28 de febrièr 2010 a l'IEO, Ostal d'Occitània, 11 carrièra Malcosinat, 31000 Tolosa. Entre-senhas : [email protected].

Reglament complet dins la seguida d'aquel papieròt.

De cara al temps, un recuelh poètic d'Andrieu Lagarda

L’Institut d’estudis occitans d’Aude acaba de publicar De cara al temps, un recuelh poètic d’Andrieu Lagarda, dins la colleccion Vendémias. L’autor, plan conegut dels amoroses de la cultura occitana, es nascut a Belestar (Arièja) en 1925. Professor, pedagògue, cronicaire, reviraire (notadament de la Letras de mon molin, d’Alphonse Daudet), publiquèt fòrça contes. Vaquí çò que ditz de la poësia, sul siti de l’IEO Lengadòc : «Per ieu, es un exercici essencial. Es per ela que me descobrissi, que me revèli a ieu-meteis, que se desvela mon èime prigond. Per venir çò qu’òm es, cal conéisser son si.»

• Andrieu Lagarda, De cara al temps, IEO Aude, colleccion Vendémias, 10 euròs. Per o crompar.

Los Invisibles, l'epopèa vertadièra de Bernat d'Audijòs en benda dessenhada revirada en occitan

D’en primièr, Los Invisibles es una benda dessenhada en francés, pareguda çò de Futuropolis l’an passat, que conta l’istòria vertadièra de Bernat d’Audijòs, que fòrmèt al sègle XVII una armada de rebèls, los invisibles, entà luchar contra una talha novèla, la gabela. Aquela epopèa se debanèt per las Lanas, region que nasquèt e que viu lo jòve autor, Jean Harambart. Era fòrt logic (e urós !) que l’editor d’Ortés (Pireneus Atlantics) Per Noste ne prepause una revirada occitana. Aquó’s fach, mercés a Clara Saint-Palais. La benda dessenhada de 190 paginas se ditz Los Invisibles se pòt crompar sul siti de Per Noste (19 euròs).

Un concors d'escritura en gascon dobèrt a totes

L’associacion culturala Aci Gascohha organisa son 19en concors d’escritura, amb lo sosten de las vilas d’Anglet, de Baiona, de Tarnòs, del Conselh General dels Pirenèus Atlantics, de l’Institut Occitan e de l’Academia Gascona. Es dobèrt a totes, dins cinc categorias (la presentacion parla de sièis mas n’ai pas vist que cinq dins lo reglament). Las òbras presentadas — poesias, contes o novèlas —, originalas e ineditas, dévon èsser escrichas dins un parlar gascon e mandadas a Aci Gasconha (19 Carrièra dels Quatre Cantons, 64600 Anglet) abans lo 3 de mai de 2010. Totas las grafias son aceptadas (mas la classica es desirada). La remesa dels prèmis se debanarà a Tarnòs lo 19 de junh de 2010. Traparètz aicí lo reglament del concors. L'associacion Aci Gasconha vòl promòure et desvolopar la practica del gascon notadament dins las vilas de Biàrritz, Anglet e Baiona e dins la Val d’Ador.

• Entresenhas : 05.59.03.34.78 ; [email protected]

Las vaissas avián folhat, lo novèl roman del Carladès Fèliç Daval

L’Ostal del libre d’Orlhac (Cantal) acaba de publicar dins la colleccion Racontes Las Vaissas avian folhat, un roman en occitan de Fèliç Daval professor e escrivan originari del Carladès. Aquò’s la seguida de son primièr libre, Les fraisses èran tombats, cronica d’un vilatge de la montanha cantalesa pareguda çò del meteis editor. Vaicí lo porgiment que ne fa L’Ostal del libre : «un raconte polifonique, ont los dialògues son nombroses, dins una lenga a l’encòp sòbra e rica de colors, d’expressions e de biais de dire priondament occitans (nòrd-lengadocian)». Per ajudar los començaires, i a un lexique occitan-francés.

Rescontre amb l’escrivan e musician lemosin Jan dau Melhau a l’Ostal d’Occitània de Tolosa

L’editor de Tolosa Letras d’Oc a convidat Jan dau Malhau, musicaire, cantaire, editor, polemista e poèta lemosin a legir de tèxtes sieus doman a l’Ostal d’Occitània de Tolosa dins l’encastre del cicle de rescontres amb d’escivans occitans Paraula viva. Letras d’Oc (qu’es pas son editor, o cal precisar) porgís atal l’escrivan nascut en 1948 a Lemòtges : 

«ua de las caras las mei originaus de la scèna e de la literatura occitanas de uei. Pr'amor que sap har cantar la lenga, que sap anar au mei pregond, que sap cridar quan cau e har deu son calam ua arma de vertat.»

La màger part de son òbra es editada çò de Las edicions dau chamin de Sent Jaume. Un un gotet amistós seguirà la lectura.

• Dijòus 3 de decembre a 18 oras e mièja a l’Ostal d’Occitania, 11 carrièra Malcosinat, 31000 Tolosa ([email protected] ; 05.61.22.13.31)

Dobertura del desen Prèmi Aran de literatura

Lo Conselh general d’Aran organisa lo 10^en prèmi Aran de literatura. Los que vòlon participar (de mai de 18 ans) dévon escriure una òbra originala en occitan — en qualsevòl de sos dialèctes o variantes — e inedita abans lo 30 d’abrial de 2010. I a tres categorias : narracion, poësia e conte pels dròlles. Los ganhaires seràn editats cò de Pagès-Editors (Lleida), dins la colleccion Garona. Prèmis de 200 euròs fins a 1.000 euròs de ganhar. Trobaretz los detalhs del concors aicí. La Val d’Aran ten un estatut d’autogovèrn dins la Generalitat de Catalonia, l’occitan aranès n’i es official. 

Texte en français dans la suite de la note.